ABŞ-nyň Prezidenti Merkezi Aziýa döwletleriniň Baştutanlaryny bilelikdäki sammite gatnaşmaga çagyrdy
Amerikanyň Birleşen Ştatlarynyň Prezidenti Jo Baýden Merkezi Aziýa döwletleriniň Baştutanlaryny şu ýylyň 19-20-nji sentýabrynda geçiriljek "Merkezi Aziýa + 1" görnüşdäki döwlet Baştutanlarynyň sammitine gatnaşmaga çagyrdy. Bu barada ABŞ-nyň Hökümetiniň Özbegistanyň Prezidenti Şawkat Mirziýoýewe ýollan hatynda mälim edilýär.
Prezident Jo Baýdeniň hatynda bellenişine görä, degişli döwletleriň Baştutanlary "Merkezi Aziýa + 1" görnüşdäki ýokary derejedäki sammite ýurtlaryň arasyndaky howpsuzlyk, ykdysady we daşky gurşaw babatdaky umumy maksatlary ara alyp maslahatlaşmak üçin gatnaşyp bilerler.
Merkezi Aziýa döwletleriniň we ABŞ-nyň döwlet Baştutanlarynyň şu görnüşdäki sammiti ilkinji gezek we BMG-niň Baş Assambleýasynyň çäklerinde geçiriler.
Merkezi Aziýa ýurtlary "Merkezi Aziýa + 1" formatynda ABŞ bilen 2015-nji ýyldan bäri özara gepleşikleri geçirip gelýärler. Geçen döwrüň içinde ABŞ-nyň Hökümetiniň dürli wekilleri Merkezi Aziýa ýurtlaryna sapar bilen baryp, ykdysady, energetika, howpsuzlyk we ekologiýa ugurlarynda hyzmatdaşlyk meselelerini özara maslahatlaşýarlar.
Sammitiň çäklerindäki boljak duşuşygyň Prezident Serdar Berdimuhamedowyň amerikan kärdeşi bilen ilkinji gönüden-göni duşuşugy bolup biler.
ORIENT news
