Türkmenistanyň Prezidenti Wengriýa saparyny amala aşyrar
Wengriýanyň daşary işler ministri Peter Siýýarto 19-20-njy awgustda Türkmenistanyň Prezidentiniň Wengriýa saparyny amala aşyrjakdygyny habar berdi diýip, köpçülikleýin habar beriş serişdeleri ýokary wezipeli döwlet işgäriniň aýdanlaryna salgylanýarlar.
Türkmenistanyň döwlet Baştutanyndan başga-da, Azerbaýjanyň, Özbegistanyň, Gyrgyzystanyň, Bosniýa we Gersogowinanyň Prezidentleriniň hem-de Çehiýanyň, Awstriýanyň we Sloweniýanyň ozalky premýer-ministrleriniň saparlaryna garaşylýar.
Ýokary derejede geçiriljek duşuşykda esasan-da, energetika howpsuzlygy, şeýle hem bikanun migrasiýa garşy göreşmek bilen baglanyşykly meseleleriň ara alnyp maslahatlaşylmagy meýilleşdirilýär.
Ozal Wengriýanyň daşary syýasat edarasynyň ýolbaşçysy türkmen kärdeşi bilen söhbetdeşliginde BMG-niň Baş Assambleýasynyň nobatdaky sessiýasynda Türkmenistanyň öňe sürýän Ählumumy howpsuzlyk strategiýasyny işläp taýýarlamak boýunça başlangyjyny goldaýandygyny beýan etdi.
Wengriýanyň Premýer-ministri şu ýylyň iýun aýynda Aşgabada saparynyň dowamynda Türkmenistanyň Ýewropada energiýa üpjünçiligini diwersifikasiýalaşdyrmaga möhüm goşant goşup biljekdigini belledi. Şol saparyň dowamynda hormatly Prezidentimiz Serdar Berdimuhamedow Wengriýanyň Hökümetiniň Başlygynyň Budapeşte gelip görmek baradaky çakylygyny kabul edipdi.
ORIENT news
