BMG-nyň Bütindünýä azyk maksatnamasy Türkmenistanyň başlangyçlaryny goldaýar
Türkmenistanyň Tokiodaky ilçisi Atadurdy Baýramow çarşenbe güni BMG-nyň Bütindünýä Azyk Maksatnamasynyň Ýaponiýa bilen aragatnaşyklar bölüminiň müdiri Ýasuhiro Sumura bilen duşuşdy.
Duşuşykda ilçi BAM-yň wekiline BMG-nyň Baş Assambleýasynyň 78-nji mejlisinde parahatçylygy we howpsuzlygy saklamaga, şeýle hem durnukly ösüş maksatlaryna ýetmäge gönükdirilen başlangyçlar barada habar berdi. Şolaryň arasynda Türkmenistanyň BMG-nyň howandarlygynda, BAM, BSGG, ÝUNISEF bilen hyzmatdaşlykda azyk howpsuzlygy boýunça esasy halkara forumy döretmek teklibi bar.
Ýasuhiro Sumura Türkmenistanyň sebitleýin we global başlangyçlaryny goldaýandygyny belläp, guramanyň olaryň öňe sürülmegine goldaw bermäge taýýardygyny aýtdy.
BMG-nyň Bütindünýä Azyk Maksatnamasy – adatdan daşary ýagdaýlarda adamlary halas edýän we jedellerden, betbagtçylykdan we howanyň üýtgemeginiň täsirlerinden soň dikeldişde bolan adamlara parahatçylyga, durnuklylyga we abadançylyga ýol açmak üçin azyk kömegini berýän, dünýä boýunça iri ynsanperwer guramasydyr.
ORIENT news
