Astanada Merkezi Aziýada iň iri tehnologik forum geçiriler
12-13-nji oktýabrda Astana şäherinde Merkezi Aziýada iň iri DigitalBridge 2023 atly tehnologik forum geçiriler.
Çärä dünýä belli IT kompaniýalarynyň wekillerini, tutuş sebitden bilermenleri, maýadarlary we işewürleri emeli intellektiň häzirki döwürde eýeleýän ornuny ara alyp maslahatlaşmak üçin çagyryldy. Ýubileý forumyň maksatnamasyna (ol eýýäm bäşinji gezek geçirilýär) Gazagystanyň Prezidentiniň gatnaşmagyndaky umumy mejlis, 30-dan gowrak panel sessiýalar, Google korporasiýasynyň guramagyndaky çäreler girizildi.
Gazagystanyň sanly ösüş, innowasiýalar we aerokosmos senagaty ministri Bagdat Musin şu gezekki duşuşygyň pudagyň hünärmenlerine we bilermenlerine emeli intellekt babatda tejribe paýlaşmak üçin mümkinçilik döretjekdigini belledi.
Forumyň jemleýji bölüminde iň gowy startaplara hem-de taslamalara, şeýle hem tapawutlanan telekeçilere DigitalBridgeAwards halkara baýragyny gowşurmak dabarasy bolar.
Foruma gatnaşyjylara startap Alleýada özleriniň ylmy we tehnologik işläp taýýarlamalary bilen tanyşdyrmak teklip ediler. IT-startaplar bolsa baýrak gaznasy dört esse ýokary bolan AstanaHubBattle-de birinjlilik ugrunda ýaryşarlar.
Maksatnamasyna mowzuklaýyn sergiler hem-de IT kompaniýalaryň boş iş orunlary ýarmarkasy girizilen DigitalBridge 2023 forumyna gatnaşmak üçin 20-nji sentýabra çenli digitalbridge.kz saýtyna ýüz tutmak gerek. Eminler topary jemleýji tapgyra geçjek on sany startapy saýlap alarlar.
DigitalBridge halkara tehnologiýa forumy Astanada 2018-nji ýyldan bäri geçirilýär. Ony Gazagystan Respublikasynyň Sanly ösüş, innowasiýalar we aerokosmos senagaty ministrligi hem-de AstanaHub tehnoparky guraýar.
ORIENT news
