Ýaşlar üçin goşmaça tomusky okuw maksatnamasy açyldy
Türkmenistanyň Ykdysadçylar birleşigi we ABŞ-nyň Halkara ösüş guramasy ýaşlaryň häzirki zaman hünär bilimlerini öwrenmekleri üçin goşmaça tomusky okuw maksatnamasyna dalaşgärleri kabul edýär. Bu taslama boýunça ozal hem ýaşlar bir tapgyr okadylypdy.
Birinji tapgyrdaky okuwlar, olaryň geçirilişi barada “ORIENT” ozal giňişleýin beýan edipdi.
Tomusky okuw maksatnamasy 14 – 26-njy awgust aralygynda dowam eder. Oňa gatnaşyjylar şu ugurlar boýunça bilimleri öwrenerler:
- Telekeçilik we biznesi meýilnamalaşdyrmagyň esaslary,
- Üstünlikli şahsy we iş durmuşyny kemala getirmek başarnyklary (soft skills),
- Sanly tehnologiýa bilimleri.
Okuwa gatnaşyjylara tejribelik usullaryny ele almaga, işine ussat tälimçiler bilen işleşmäge, üstünliklere eýe bolan ýurdumyzyň işewürleri bilen ussatlyk sapaklaryny we duşuşyklaryny geçmäge mümkinçilik dörediler.
Tomusky okuw maksatnamasyna 15 – 18 ýaş aralygyndaky ýaşlar gatnaşyp bilerler. Oňa gatnaşmak üçin onlaýn görnüşde degişli sowalnamany doldurmaly.
Okuwa resminamalar 12-nji awgusta çenli kabul edilýär. Goşmaça maglumatlary şu telefon belgileri arkaly alyp bilersiňiz: (+993 62) 979068, (+993 65) 851782.
ORIENT news
