Gyrgyzystanda syýahatçylar üçin sanly hyzmat işe girizildi
Gyrgyzystanda syýahatçylar üçin ýene-de bir täze onlaýn hyzmat platformasy işe girizildi. Bu barada ýurduň sanly ösüş ministriniň sözlerine salgylanyp, “Kabar” habarlar agentligi habar berýär.
Indi daşary ýurtly syýahatçylar Ilaty hasaba alyş müdirliginiň web-saýty arkaly özlerini hasaba aldyryp bilerler. Munuň üçin, web-saýtda “Şahsy otag” döredilip, onuň üsti bilen gerekli resminamalaryň elektron nusgalary tabşyrylýar we web-kamera arkaly resminamalary tabşyrýanyň suraty alynýar.
Bu alnan surat soňra, daşary ýurtly syýahatçy Gyrgyzystana gelende deňeşdirilýär. “Face ID-si” deň gelen syýahatçy hasaba aldyrmak üçin indiki iş tapgyrlaryny ýerine ýetirip biler. Bellenişine görä, syýahatçylary onlaýn hasaba almak işi bu ugurda döräp biljek korrupsiýa töwekgelçiliklerini aradan aýyrmak we daşary ýurtlulary hasaba almak işini çaltlandyrmak maksady bilen ýola goýuldy.
Bu başlangyç Gyrgyzystanyň Sanly ösüş ministrligi we Döwlet howpsuzlyk komiteti tarapyndan ýurduň Syýahatçylygy ösdürmek baradaky gaznasynyň ýardamy bilen durmuşa geçirilýär.
ORIENT news
