Owganystan ilkinji gezek ABŞ-a önüm eksport etdi - bu nar şiresidir
Owganystanyň Söwda we senagat ministrligi Owganystandan ABŞ-a ilkinji gezek nar şiresi içgiler tapgyrynyň eksport edilendigini habar berdi. Içgiler Hyratdaky kompaniýa tarapyndan öndürilendir.
Ministrligiň resmi wekili Ahundzad Abdul Salam Jawadyň aýtmagyna görä, bu içerki önümiň eksporty ýurduň ykdysadyýetiniň ösüşinde möhüm ädimdir – diýip, TOLOnews habarlar gullugy habar berýär.
“Ýakynda “Pamir Kola” kompaniýasynyň nar şiresi içgileri bolan 45 tonnalyk iki konteýner Amerika ugradyldy. Şeýle hem, içgiler Germaniýa we Gazagystana iberildi, bu ugurda eksportyň möçberini giňeltmek meýilnamalarymyz bar, biz önümlerimizi beýleki ýurtlara hem ugradyp bilerdik” – diýip, ministrligiň wekili aýtdy.
Kompaniýanyň satuw boýunça müdiri TOLOnews-e “Pamir Kola” kompaniýasynyň öz önümlerini Eýrana, Birleşen Arap Emirliklerine we Merkezi Aziýa ýurtlaryna hem ugradýandygyny belleýär. Alkogolsyz içgiler tapgyry ABŞ-nyň Kaliforniýa ştatyna Karaçi portunyň üsti bilen eksport edildi.
Hyrat Söwda we maýa goýum palatasynyň statistikasyna görä, häzirki wagtda bu senagat şäherinden dürli ýurtlara önümleriň 15 görnüşi eksport edilýär. Bu ýyl Hyratdan eksport, geçen ýyl bilen deňeşdirilende, 11% ýokarlandy we umumy söwda ABŞ-nyň 110 million dollaryna deň boldy.
Ozal Owganystanyň Söwda we senagat ministrligi şu ýyl ýurduň eksportynyň umumy möçberiniň 350 million dollardan geçendigini habar beripdi. Eksportyň aglaba köp bölegi (esasan-da täze we kakadylan miwe, haly we safran) Pakistana, Hindistana, Hytaýa we Eýrana gidýär.
Owgan öndürijileri täze gaýtadan işleýän kärhanalary we iş ýerleri döretmek üçin has köp maýa goýumlaryny çekmegi umyt edýärler. Ýaňy-ýakynda Kabulda ýüzlerçe ýerli kompaniýanyň we Eýranyň, Türkmenistanyň, Türkiýäniň we Päkistanyň wekilleriniň gatnaşmagynda geçirilen senagat sergisiniň esasy maksady hem şundan ybarat. Netijede, umumy möçberi 45 million dollarlyk söwda ylalaşyklaryna gol çekildi.
ORIENT news
