BMG Aşgabatda terrorçylyga garşy öňünden habardar etmek boýunça çäre geçirdi
Aşgabatda BMG-nyň «Merkezi Aziýa üçin terrorçylyga garşy babatda öňünden habardar etmegiň tory» atly çäre boldy. Bu barada Garaşsyz Döwletleriň Arkalaşygynyň Ýerine ýetiriji komitetiniň saýtynda habar berilýär.
Çäre BMG-nyň terrorçylyga garşy Müdirligi we Merkezi Aziýada öňüni alyş diplomatiýasynyň Sebitleýin merkezi tarapyndan gurnaldy.
Türkmenistanyň döwlet gurluşlarynyň we halkara guramalarynyň wekilleri sebitde howpsuzlygy üpjün etmegiň bilelikdäki ölçeglerini we çemeleşmelerini ara alyp maslahatlaşdylar. Şunuň bilen baglylykda sebitleýin gurluşlaryň, şol sanda GDA-nyň terrorçylyga garşy merkeziniň maglumat alyşygyny gurnamak we terrorçylyga we ekstremizme garşy göreşmek babatynda raýat jemgyýetiniň institutlary bilen hyzmatdaşlygyň tejribesi görkezildi.
Öňünden habardar etmek tory «BMG-nyň Bütindünýä terrorçylyga garşy strategiýasyny Merkezi Aziýada hemmetaraplaýyn ýerine ýetirmegiň ýolunda» taslamasynyň dördünji tapgyrynyň çäklerinde işlenip düzüldi. Onuň maksady – hukuk goraýjy edaralaryň, howpsuzlyk edaralarynyň, gümrük we serhet gulluklarynyň milli we sebitleýin derejesinde terrorçylyga garşy netijeli strategiýalary işläp düzmekde we çagyryşlara we howplara ýeterlik jogap gaýtarmakda mümkinçiligini pugtalandyrmakdyr. Ol şeýle hem hukuk goraýjy edaralaryň arasynda hyzmatdaşlygy we utgaşdyrmany kämilleşdirmäge, şol sanda maglumat alyşygyny gowulandyrmak arkaly kämilleşdirmäge gönükdirilendir.
ORIENT habarlar
