“Her bir çaga - ähli hukuklar”: Türkmenistanyň çagalar dynç alyş-sagaldyş merkezlerinde çagalar maglumat beriji we düşündiriş çärelerine gatnaşdylar
Türkmenistanyň çagalar dynç alyş-sagaldyş merkezlerinde ýaş nesliň wekilleriniň adam hukuklary, çaganyň hukuklary we mümkinçilikleri çäkli adamlaryň hukuklary baradaky düşünjesini ýokarlandyrmaga gönükdirilen interaktiw çäreler tapgyry geçirildi. Olara Gökderedäki çagalar dynç alyş-sagaldyş merkezleriniň bäşisinde dynç alýan çagalaryň 250-den gowragy gatnaşdy.
Däp bolan bilim kampaniýasy eýýäm üç ýyl bäri yzygiderli geçirilýär we ol Türkmenistanyň Ombudsmeniniň edarasynyň, Türkmenistanyň Bilim ministrliginiň, ÝUNISEF-iň we BMG-niň Adam hukuklary baradaky Ýokary komissarynyň Merkezi Aziýa boýunça sebitleýin bölüminiň bilelikdäki başlangyjydyr.
Bu ýyl BMG-niň Adam hukuklary baradaky Ýokary komissarynyň Merkezi Aziýa boýunça sebitleýin bölümi Adam hukuklarynyň ählumumy Jarnamasynyň 75 ýyllygyna bagyşlanan "Adam Hukuklary 75" kampaniýasynyň çäklerinde çagalar sagaldyş merkezlerini goldaýar. Taslama adam hukuklarynyň ähliumumylygy we bölünmezligi baradaky düşünjeliligi ýaýbaňlandyrmagy, adamlaryň, esasanam ýaşlaryň arasynda olaryň mümkinçiliklerini giňeltmegi maksat edinýär. Çagalar täze bilim aldylar we hukuklaryny goramagy öwrendiler.
Oýun görnüşinde geçirilen öwredijilik häsiýetli çäreler çagalara öz pikirlerini erkin beýan etmek we arzuw-isleglerini paýlaşmak endiklerini ösdürmäge mümkinçilik berdi. Maglumat sessiýalary, esasan, Adam hukuklarynyň ählumumy Jarnamasynyň, çaganyň hem-de maýyplaryň hukuklary hakynda Konwensiýalaryň düzgünleridir esasy ýörelgeleri bilen tanyşmaga gönükdirildi. Şeýle-de oňa gatnaşyjylar diskriminasiýa ýol bermezlik, çaganyň iň ýokary bähbitleri, saglyk, ösüş ýaly mowzuklary, şeýle hem çaganyň we maýyplaryň hukuklary baradaky milli kanunlary gözden geçirdiler.
“Bu çärä gatnaşanyma men örän şat - adam hukuklary, çaganyň hukuklary hakda köp zat öwrendim, mysal üçin, her bir çaganyň okamaga, dynç almaga, howpsuz gurşawda ýaşamaga we başga-da köp zatlara hukugynyň bardygyny bildim. Maýyplygy bolan çagalaryň hukuklary we ähli çagalaryň deňdigi barada bilmek diýseň gyzykly boldy"- diýip, “Nesil” çagalar sagaldyş merkezinde geçirilen çäreler tapgyryna gatnaşan 10 ýaşly Medine öz pikiri bilen paýlaşdy.
ORIENT news
