Saud Arabystany düýe hojalygyny ösdürýär
Saud Arabystanynyň Döwlet maýa goýum gaznasy Patyşalykda düýe hojalygynyň ösüşini üpjün etmek üçin Sawani kompaniýasynyň döredilýändigini yglan etdi.
Kompaniýa Saud Arabystanynyň ykdysadyýetini diwersifikasiýalaşdyrmaga ýardam edip, düýe süýdünden süýt önümlerini öndürmek boýunça öňdebaryjy öndüriji bolmaga niýetlenendir. Bu şeýle hem azyk we oba hojalyk pudaklarynyň ösüşini üpjün eder.
Şeýlelikde, Sawani önümçiligiň, paýlamanyň we marketingiň ähli tapgyrlarynda durnukly ösüşden ugur alar, şeýle hem sarp edijileriň düýe süýdünden alynýan önümleriň saglyk üçin peýdasy hakynda habardarlygyny ýokarlandyrar. Düýe süýdi özüniň iýmitlendiriji häsiýetleri bilen giňden bellidir, onda minerallaryň we ýokumlaryň uly mukdary, şol sanda A, B, E we C ýokumlar bardyr.
Döwlet maýa goýum gaznasynda belleýişleri ýaly, Saud Arabystany düýe süýdi senagaty babatynda giň tejribä we bilime eýedir.
Gelejekde Patyşalyk köp peýdaly häsiýetleri bolan düýe süýdünden alynýan önümleri sebit we dünýä bazarlaryna eksport etmegi maksat edinýär.
ORIENT habarlar
