Türkmenistanyň we Täjigistanyň BMG-nyň Ženewadaky Bölüminiň hemişelik wekilleri ýurtlaryň arasyndaky hyzmatdaşlyga baha berdiler
Türkmenistanyň we Täjigistanyň BMG-nyň Ženewadaky Bölüminiň ýanyndaky hemişelik wekilleri Atageldi Haljanow we Şaraf Şeralizoda iki döwletiň arasyndaky ikitaraplaýyn hyzmatdaşlyga, şeýle hem meseleleriň giň görnüşi boýunça dialogyň ýagdaýyna we gelejegine baha berdiler.
Duşuşygyň barşynda türkmen diplomaty özüniň täjik kärdeşini jogapkärli wezipä bellenmegi bilen gutlady we hyzmatdaşlygy we däp bolup gelýän dostluk gatnaşyklaryny we ýurtlaryň arasyndaky konstruktiw özara gatnaşygy pugtalandyrmaga taýýardygyny beýan etdi – diýip, Türkmenistanyň BMG-nyň Ženewadaky Bölüminiň ýanyndaky hemişelik wekilhanasy habar berýär.
Taraplaryň ikisiniň hem abraýly halkara guramalaryň, aýratynam BMG-nyň çäklerinde hyzmatdaşlyga uly üns berýändikleri nygtaldy. Gyzyklanmalaryň görnüşi giňdir: syýasatdan we ykdysadyýetden başlap medeniýet we bilim babatyndaky aragatnaşyklara çenli.
Türkmenistanyň hemişelik wekili özüniň täze kärdeşine halkara jemgyýetçiliginiň ähli agzalary bilen yzygider global gepleşikleri gurmakda üstünlikleri arzuw etdi.
ORIENT habarlar
