Türkmenistanyň wekiliýeti ÝHHG-nyň howanyň üýtgemegi boýunça Maslahatyna gatnaşdy
Türkmenistanyň wekiliýeti oba hojalygy we daşky gurşawy goramak ministri Çaryýar Çetiýewiň baştutanlygynda ÝHHG-nyň howanyň üýtgemegi boýunça Wenada geçen Maslahatyna gatnaşdy.
Maslahata gatnaşyjylaryň öňünde çykyş etmek bilen, türkmen wekiliýetiniň baştutany ýurduň howanyň üýtgemegine garşy göreşmekdäki üstünlikleri barada gürrüň berdi we bu babatdaky milli ileri tutulýan ugurlary kesgitledi.
Şeýlelikde, howanyň üýtgemegi babatynda milli strategiýanyň çäklerinde Türkmenistan üçin ileri tutulýan wezipeler aşakdakylardyr:
-ýurduň çäginde howa we howanyň üýtgemegine gidrometeorologik gözegçilikleriň kämilleşdirilmegi, howanyň üýtgemeginiň täsirlerini ýumşatmak we howanyň üýtgemegine uýgunlaşmak boýunça çäreleriň işlenip düzülmegi we ýerine ýetirilmegi;
-
ýangyç-energetika serişdelerini tygşytlamak boýunça çäreleriň durmuşa geçirilmegi we energonetijeli we serişdeleri tygşytlaýjy tehnologiýalary ulanmaklygyň hasabyna 2030-njy ýyla çenli parnik gazlarynyň zyňylmagyny durnuklaşdyrmak;
-howanyň üýtgemegine garşy göreşmegiň çäreleri babatynda halkara hyzmatdaşlygynyň derejesini ýokarlandyrmak.
Maslahaty ÝHHG-nyň baş sekretary Helga Mariýa Şmid geçirdi. Oňa ÝHHG-nyň agza-ýurtlarynyň we hyzmatdaşlarynyň ministrleri, howa boýunça wekilleri we beýleki ýokary derejeli syýasy işgärleri, halkara guramalarynyň we raýat jemgyýetçiliginiň wekilleri, bilermenler gatnaşdylar.
Maslahat ÝHHG-nyň sebidinde howpsuzlyk we durnuklylyk üçin howanyň üýtgemeginiň mümkin bolan netijelerini ara alyp maslahatlaşmaga meýdançany üpjün etdi.
ORIENT habarlar
