Russiýanyň, Kataryň we Türkmenistanyň gatnaşmagyndaky gaz merkezi boýunça gepleşiklere Eýran oňyn baha berdi
Yslam Respublikasynda gaz merkezini döretmek boýunça Russiýa bilen geçirilen gepleşiklere Eýran gowy baha berýär. Bu barada OPEK-iň sekizinji halkara seminarynyň çäginde Eýranyň nebit ministri Jawad Ouji žurnalistlere aýtdy.
«Biz Eýranda gaz merkezi boýunça Russiýa bilen gaty gowy gepleşikler geçirýäris» diýip, ol gepleşikleriň iki aý mundan öň başlandygyny belländigini TASS habar gullugy habar berýär.
Ouji, Eýranyň merkezi döretmek üçin uly gaz gorlarynyň we infrastrukturasynyň bardygyny aýtdy. «Gaz gorlary boýunça - Katar, Türkmenistan ýaly goňşularymyzyňam uly mümkinçilikleri bar. Bu faktorlar Eýrany sebitdäki gaz merkezine öwürmek üçin ajaýyp mümkinçilik döredýär»,-diýip ministr nygtady.
Ol Eýranyň dürli ýurtlar bilen üstünlikli gepleşik geçirýändigini belledi.
Ozal Ouji Russiýanyň, Kataryň we Türkmenistanyň gatnaşmagynda Eýranyň, Pars aýlagynyň demirgazyk kenaryndaky Buşehr welaýatynda ýerleşýän Assaluýe senagat sebitinde gaz merkezini döretmegi meýilleşdirýändigini aýtdy.
OPEK-iň 8-nji halkara seminary 5-6-njy iýulda Wenadaky Hofburg köşgünde geçirilýär. Oňa OPEK ýurtlarynyň ministrleri we beýleki nebit öndürijiler, halkara guramalarynyň ýolbaşçylary we dünýäniň iň uly energetika kompaniýalarynyň ýolbaşçylary gatnaşýar. Çäräniň esasy mowzugy «Durnukly we inklýuziw energetika geçiş ýolunda» bolup durýar.
ORIENT news
