Biržada bir günde 25 million dollara golaýlyk söwda geleşikleri baglaşyldy
5-nji iýulda Türkmenistanyň Döwlet haryt-çig mal biržasynda umumy bahasy 24,8 million dollara barabar bolan 13 söwda geleşigi baglaşyldy. Şol günki söwdalarda suwuklandyrylan gaz, ECO-93 görnüşli awtobenzin, dizel ýangyjy, jins jalbary uly islegden peýdalandy.
Owganystandan gelen işewürler “Türkmengaz” döwlet konserniniň kärhanalarynda öndürilen suwuklandyrylan gazyň 1 müň tonnasyny 335,2 müň amerikan dollaryna satyn aldylar. Goňşy döwletden söwda işewürleriniň ýene bir topary “Türkmenhimiýa” döwlet konserniniň degişli kärhanasynda öndürilen ekologiýa taýdan arassa benziniň 35 müň tonnasyny 22,9 million dollara satyn aldylar.
Şeýle hem, owgan işewürleri “Türkmennebit” döwlet konserniniň kärhanalarynda öndürilen dizel ýangyjynyň 2,5 müň tonnasyny 1,4 million dollara satyn aldylar.
Mundan başga-da, gyrgyzystanly işewür türkmen işewüri bilen 48,1 müň dollara jins jalbarynyň 13,2 müň sanysyny satyn almaga geleşik baglaşdy.
ORIENT news
