Astanada žurnalistleriň Seýilgähi peýda boldy
Gazagystanyň paýtagty Astanada žurnalistleriň seýilgähi peýda boldy- diýip, Gazak halkara maglumatlar agentligi Kazinform habar berýär.
Onuň açylyşy 6-njy iýulda belleniljek paýtagtyň 25-ýyllygynyň öňüsyrasynda bolup geçdi. Neşirýat pudagynyň işgärleriniň hormatyna seýilgähde Okyjynyň, Habarçynyň we Operatoryň ýörite heýkelleri ýeleşdirilipdir.
«Žurnalistika – uly jogapkärçiligi talap edýän we jemgyýetiň ösüşine saldamly goşant goşýan ajaýyp kärdir. Žurnalistleriň seýilgähiniň şäherlileriň halaýan ýeri we paýtatyň bezegi boljakdygyna ynanýaryn» — diýip, Astananyň häkimi Ženis Kasymbek açylyş dabarasynda çykyş etmek bilen aýtdy.
Ol şeýle hem häzirki wagtda Astanada iri neşirleriň we KHBS-niň edaralarynyň hereket edýändigini belledi.
Gazagystanda golaýda täze baýramyň — Milli metbugat gününiň döredilendigini belläp geçmelidiris. Ol 2-nji fewralda bellenip geçiler.
ORIENT habarlar
