"Yalla" ansamblynyň döredilenine ýarym asyr doldy. Toparyň agzalary Özbegistanyň Prezidenti tarapyndan sylaglandy
Özbegistanyň Prezidenti Şawkat Mirziýoýew “Ýalla” ansamblynyň agzalaryny ansamblyň döredilmeginiň 50 ýyllygy mynasybetli orden bilen sylaglady.
“Ýiti zehini, ýokary hünär ussatlygy, köpýyllyk netijeli we döredijilikli işi, özbek estrada sungatynyň ösmegine, onuň halkara derejesinde giňden ýaýbaňlanmagyna, medeni gatnaşyklaryň, halklaryň arasyndaky dost-doganlygyň berkemegine goşan uly goşandy, ýaş zehinleriň ukyp-başarnyklaryny ösdürmekde, halky, esasanam ýaşlary watançylyk ruhunda terbiýelemekde, milli we umumyadamzat gymmatlyklaryna hormat goýmakda gazanan aýratyn üstünlikleri üçin, şeýle-de “Ýalla” ansamblynyň döredilmeginiň 50 ýyllygy mynasybetli...” – diýlip, Özbegistanyň Döwlet Baştutanynyň saýtynda 1-nji iýulda çap edilen Permanda bellenilýär.
Permana laýyklykda, ansamblyň çeper ýolbaşçysy Farruh Karimow “El-ýurt hurmati” ordeni bilen sylaglandy, sazandalar Abbos Aliýew, Jawlon Tohtaýew, Timur Halikow we Igor Halikow dagylar bolsa “Dustlik” ordenine mynasyp boldular.
"Yalla" wokal-instrumental ansambly 1970-nji ýyllaryň başynda meşhurlyk gazanyp ugrady. Ol “Siýaý, Taşkent”, “Tri kolodsa”, “Ýalla”, “Bez lýubimyh glaz” ýaly aýdymlary bilen birnäçe nesilleriň mizemez söýgüsine mynasyp boldy.
ORIENT news
