Ombudsmeniň edarasy ÝUNISEF bilen bilelikde Türkmenistanyň welaýatlarynda çaganyň hukuklary boýunça seminarlary geçirdi
Türkmenistanyň Ombudsmeniniň edarasy we BMG-niň Çagalar gaznasynyň ýurdumyzdaky wekilhanasy (ÝUNISEF) maý-iýun aýlarynda Ahal, Balkan we Mary welaýatlarynda çagalar bilen işleýän döwlet işgärleri üçin çaganyň hukuklaryny goramak we öňe sürmek barada habardarlygy ýokarlandyrmak boýunça birnäçe okuw maslahatlaryny geçirdi.
Bu seminarlar 2023-nji ýyl üçin Bilelikdäki iş meýilnamasynyň çäginde gurnalýar we ilatyň iň ejiz gatlaklarynyň, şol sanda çagalaryň we maýyp adamlaryň hukuklarynyň goralmagyny üpjün etmek üçin garaşsyz gözegçiligiň milli mümkinçiliklerini giňeltmäge gönükdirilendir.
Okuwlar Änewde, “Awaza” Milli syýahatçylyk zolagynda we Mary şäherinde geçirildi. Olara Mejlisiň deputatlary, sebit dolandyryş, prokuratura, kazyýet, polisiýa, Raýat Ýagdaýynyň Namalarynyň Ýazgysyny bellige alyş (RÝNÝ) edaralarynyň, Adwokatlar kollegiýasynyň, Ýaşlar guramasynyň, Zenanlar birleşiginiň, mekdepleriň, saglyk öýleriniň we KHBS-niň wekilleri gatnaşdylar.
Okuw maslahatlarynyň dowamynda döwlet işgärleri çaganyň hukuklary, şol sanda BMG-niň çaganyň we saglyk ýagdaýy sebäpli mümkinçilikleri çäkli adamlaryň hukuklary barada konwensiýalary, çaganyň bähbitlerini göz öňünde tutmak arkaly hukuklaryny goramagyň we üpjün etmegiň ýollary hakynda halkara we milli kanunlar baradaky bilimlerini çuňlaşdyrdylar.
― Biz Ombudsmeniň edarasyna welaýatlarda çagalar bilen işleýän hünärmenler bilen seminarlary geçirmek başlangyjy üçin minnetdarlygymyzy bildirýäris we her bir çaganyň durmuşyny gowulaşdyrmak, milli ileri tutulýan ugurlaryň durmuşa geçirilmegine we ýurduň halkara borçnamalarynyň ýerine ýetirilmegine ýardam etmek üçin hemmämiz birek-birekden köp zatlary öwrenip bileris, diýip umyt edýäris – diýip, ÝUNISEF-iň Türkmenistandaky wekili Muhammet Faýýazi aýtdy.
ORIENT news
