Üstýurt platosynda serhetüsti goraghanany döretmek mümkinçiligi ara alnyp maslahatlaşylýar
2023-nji ýylyň oktýabr aýynda Özbegistanyň Samarkand şäherinde ýabany haýwanlaryň göçüp-gonup ýören görnüşlerini gorap saklamak baradaky konwensiýa (CMS COP14) gatnaşýan döwletleriň 14-nji maslahaty geçiriler. Türkmenistan, Gazagystan we Özbegistan Üstýurt serhet üçburçlugynda tebigaty goramak pudagynda serhetaşa hyzmatdaşlygy güýçlendirmegi maksat edinýärler. Taraplaryň wekilleri Nöküsde tejribe alyşmak üçin duşuşdylar. Türkmenistandan Gaplaňňyr goraghanasynyň işgärleri gatnaşdylar.
Gazagystanyň, Türkmenistanyň we Özbegistanyň arasyndaky serhet üçburçlygyndaky Üstýurt platosy, Birleşen Milletler Guramasynyň ýabany haýwanlaryň göçüp-gonup ýören görnüşlerini goramak baradaky konwensiýasynyň Merkezi Aziýa süýdemdirijiler boýunça başlangyç bilen serhetüsti nokat hökmünde bellendi. Bu sebit urial, Aziýanyň gulanlary we jerenleri ýaly serhetüsti sürüleri gorap saklamakda esasy orun tutýar.
Duşuşykda kamera duzaklaryndan peýdalanyp gözegçilik etmegiň we dürli ekspedisiýalardaky gözegçilikleriň netijeleri hödürlendi, toýnaklylaryň serhetaşa göçmegini üpjün etmek üçin serhet päsgelçiliklerini uýgunlaşdyrmak boýunça teklipler gözden geçirildi. Şeýle hem, üç ýurduň arasynda serhetaşa goralýan sebit döretmek mümkinçiligi ara alnyp maslahatlaşyldy diýip, DAZ Asia habar berýär.
Çalşygyň bir bölegi Üstýurt platosyndan we Sudoçye ýabany tebigat goraghanasyndan Aral deňziniň kenaryna alyp barýan iki günlük ekspedisiýa bolup, Merkezi Aziýanly kärdeşler ýerdäki bar bolan gorag çäreleri bilen tanyşmaga mümkinçilik aldylar. Gezelenç, duşuşyga gatnaşyjylary has ýakynlaşdyrdy we geljekdäki hyzmatdaşlyk üçin ynamdar gatnaşyk döretmäge ajaýyp mümkinçilik berdi.
Alyş-çalyşyň netijeleri we mundan beýläkki çäreler üçin teklipler «Nöküsiň oýlanmalarynda» ýazylýar. Onda ýörite goralýan tebigy sebitlerde aragatnaşygy we hyzmatdaşlygy gowulandyrmak üçin üç ýurduň arasynda bilelikdäki düşünişmek Ähtnamany işläp düzmäge taýýardygy nygtalýar. Oňa oktýabr aýynda Samarkantda CMS COP14 çäginde gol çekiler. Ähtnamanyň iýun aýynyň ahyrynda Germaniýanyň Wilm adasynda süýdemdirijiler boýunça Merkezi Aziýanyň başlangyjy seminarynyň çäginde deslapky taýýarlanmagyna garaşylýar.
Çäreler, German Federatiw Respublikasynyň Ykdysady Hyzmatdaşlyk we Ösüş Federal Ministrligi tarapyndan maliýeleşdirilýän we Germaniýanyň Halkara Hyzmatdaşlyk Jemgyýeti (GIZ) we Mihael Sukkow gaznasy tarapyndan durmuşa geçirilýän «Aral deňzinde daşky gurşawa gönükdirilen sebit ösüşi» sebit taslamasynyň çäginde goldanýar.
ORIENT news
