Türkmenistan seýsmologiýa pudagynda öňdebaryjy tehnologiýa öndürijileriň halkara maslahatyna gatnaşdy
Türkmenistanyň Awstriýa Respublikasyndaky ilçisi “Ylym we tehnika – 2023” ady bilen geçirilýän halkara maslahatyň açylyş dabarasyna gatnaşdy. Oňa Türkmenistanyň Ylymlar akademiýasynyň Seýsmologiýa we atmosferanyň fizikasy institynyň alymlary hem sanly ulgam arkaly gatnaşdylar.
Halkara ylmy maslahatda dünýäniň ylmy-barlag institutlarynyň wekilleri seýsmologiýa pudagynda iň soňky işläp taýýarlamalar, seýsmiki hadysalara gözegçilik etmek we netije çykarmak boýunça ara alyp maslahatlaşmalary guradylar.
Halkara maslahat Wena şäherinde 23-nji iýuna çenli dowam edip, ol Ýadro synaglaryny hemmetaraplaýyn gadagan etmek hakyndaky Şertnama gatnaşyjy ýurtlaryň guramasy tarapyndan geçirilýär.
Bu guramanyň seýsmiki gözegçilik boýunça dünýäde 50 töweregi esasy we 120 sany hem kömekçi stansiýalary hereket edýär. Ozal habar berlişi ýaly, Türkmenistanda döwrebap seýsmiki gözegçilik stansiýasyny gurmak boýunça halkara bäsleşigi yglan edildi.
ORIENT news
