Türkmenistan we BAE bilelikde welosport çärelerini geçirmegi ylalaşdylar
Abu-Dabiniň Welosiped klubynyň ýerine ýetiriji direktory Al Nahir Al Haýliniň ýolaşçylygyndaky arap wekiliýeti sapar bilen Aşgabada geldi. Onuň barşynda wekiliýet topary paýtagtymyzyň Olimpiýa şäherçesine baryp görüp, türkmen kärdeşleri bilen bu sport görnüşini ösdürmek boýunça hyzmatdaşlyk meselelerini ara alyp maslahatlaşdylar.
Türkmenistanda welosiped sportyny ösdürmek üçin maýa goýumlary çekmek meseleleri hem söhbetdeşligiň esasy temasy boldy. Şunuň bilen baglylykda, türkmen tarapy özara hyzmatdaşlygy ösdürmek üçin Abu-Dabi şäherine sapar bilen barmaga çagyryldy.
BAE-niň Daşary işler ministrliginiň mälim etmegine görä, taraplar welosport boýunça özara ýygyndylaryň saparlaryny guramak, tejribeleri alyşmak we bilelikde sport çärelerini geçirmek boýunça ylalaşdylar. Saparynyň çäginde, arap wekiliýeti Olimpiýa şäherçesinde döredilen mümkinçilikler we bu ýerdäki ýapyk görnüşli welotrek toplumy bilen ýakyndan tanyş boldy.
ORIENT news
