Aşgabatda Halkara ýoga güni bellendi
Her ýylyň 21-nji iýunynda bellenýän Halkara ýoga güni Aşgabatda hem bellenip geçildi. Halkara gününiň bu senede bellenmeginiň aýratyn manysy bar. Çünki 21-nji iýun – bu ýylyň iň uzak gündizi bolup, ýoga bilen meşgullanýan adamlar bu günüň aýratyn energiýasynyň bardygyny belleýärler. Mundan ozal, Hindistan Respublikasynyň ýurdumyzdaky ilçihanasynyň guramagynda Halkara ýoga güni ýurdumyzyň dürli şäherlerinde bellenipdi. Bu ýyl bu sene paýtagtymyz Aşgabatda uly dabara beslendi.
Däp boýunça Halkara ýoga gününde paýtagtymyzdaky “Bagtyýarlyk” sport toplumynda köpçülikleýin ýoga maşklary geçirildi. Säher bilen sport toplumynyň töweregi köp adamly boldy. Çäräniň başynda Hindistan Respublikasynyň Türkmenistandaky ilçisi Widhu Nair çykyş edip, ol ýoga we onuň döreýşi barada gyzykly maglumatlary berdi. Bellenişine görä, ýoga bu haýsydyr bir dine ýa-da jemgyýete degişli zat däldir. 2015-nji ýylda Aşgabatda açylan ýoga merkezi Merkezi Aziýada açyla ilkinji ýoga merkezi bolup, Türkmenistanyň we Hindistanyň medeni gatnaşyklarynyň aýrylmaz nyşanlarynyň biridir.
Häzirki wagtda Aşgabatdaky ýoga merkezinde 3 müňden gowrak agza hasaba alnyp, 700 töweregi adam bu merkeze gelip, rahatlandyryjy maşklar bilen yzygiderli meşgullanýar. Öz gezeginde, bu merkeze gelen Türkmenistanyň Saglygy goraýyş we derman senagaty ministri Atageldi Germanow bu ýere ýygnananlary Halkara ýoga güni bilen gutlady. Soňrabu ýerde köpçülikleýin ýoga maşklary ýerine ýetirildi.
