Tehas uniwersitetinde türkmen-amerikan alymlar assosiasiýasynyň simpoziumy geçirildi
TASA – türkmen-amerikan alymlar assosiasiýasynyň 17-nji simpoziumy Ostin şährinde ýerleşýän ABŞ-nyň Tehas uniwersitetinde geçirildi. Duşuşyga ABŞ-da we beýleki ýurtlarda tälim alýan we işleýän türkmen alymlary, şeýle hem Türkmenistanyň ABŞ-daky ilçihanasynyň wekili gatnaşdy.
Simpozium garaýyşlary we pikirleri alyşmak üçin professorlary, hünärmenleri, gözlegçileri, talyplary, täzelikçileri we dürli bilimleriň hünärmenlerini birleşdirýän özboluşly platforma. Çäräniň dowamynda jemgyýetiň agzalary lukmançylyk, mikrobiologiýa, internet tehnologiýalary, ykdysady we sosial meseleler ýaly derwaýys mowzuklar boýunça ylmy işleri barada çykyş etdiler.
Çäräniň çäginde ABŞ-daky Türkmenistanyň konsuly watandaşlarymyz bilen duşuşyp, ýurduň durmuşynda bolup geçen häzirki özgerişler, daşary syýasatynyň ileri tutulýan ugurlary barada gürrüň berdi. Esasan hem, parahatçylyk we howpsuzlyk, halklaryň abadançylygy we gülläp ösüşi üçin öňe sürlen halkara başlangyçlar gyzyklanma bilen ara alnyp maslahatlaşyldy. Mundan başga-da, konsullyk meseleleri boýunça geňeşmeler guraldy.
TASA simpoziumy mynasybetli kabul edişlik – «Türkmen agşamy» geçirildi. Onda türkmen diasporasynyň wekilleri milli aýdymlary ýerine ýetirdiler. Şeýle-de sözleri we sazy türkmen halkynyň Milli Lideri Gurbanguly Berdimuhamedow tarapyndan döredilen aýdymlar hem ýerine ýetirildi.
ORIENT news
