Sankt-Peterburgda "1703" häzirki zaman sungat ýarmarkasy açyldy
"1703" ikinji Sankt-Peterburg sungat ýarmarkasynyň açylyş dabarasy 13-nji iýunda "Manež" sergi zalynda geçirildi. Taslama “Gazprom” Paýdarlar jemgyýetiniň başlangyjy bilen Sankt-Peterburgyň Medeniýet komitetiniň goldamagynda guralyp, çäre Sankt-Peterburg halkara ykdysady forumynyň medeniýet festiwalynyň meýilnamasyna girýär.
Bir ýyl mundan ozal ýola goýlan bu ýarmarka eýýäm möhüm waka öwrüldi we şu ýyl oňa Türkiýe hem öňdebaryjy nakgaşlarynyň eserleri bilen gatnaşdy. Umuman alanyňda, taslama Stambuldan, Moskwadan, Sankt-Peterburgdan, Nižniý Nowgoroddan we Kalugadan 36 galereýa gatnaşýar, olar öz stendlerinde žiwopis, heýkeltaraşlyk, grafika, fotosurat, gurnama we sanly tehnologiýalaryň kömegi bilen döredilen eserleri hödürleýärler. Fotosurat eserleri sergide giň orun alandyr.
Jemgyýetçilik medeni we bilim maksatnamasynyň çäginde ýarmarka gelýänlere art-meditasiýlar, şeýle hem sungat pudagyndaky öňdebaryjy bilermenleriň gatnaşmagynda leksiýalar we çekişmeler garaşýar. Esasy mowzuklaryň arasynda galereýa işi, sungatda täze tehnologiýalar, kolleksiýa dizaýny, ýaş sungat we döredijilik pudagyndaky bilim bar.
Guramaçylyk toparynyň berýän metbugat beýanatyna görä, ýarmarkanyň iň möhüm wezipeleri häzirki zaman sungatyny goldamak we wagyz etmek, ýygnamak tejribesini ösdürmek we hünär jemgyýetiniň dürli wekillerini birleşdirmekdir.
ORIENT news
