Merkezi Aziýa ýurtlarynyň we Latwiýanyň ulag edaralary hyzmatdaşlyk hakynda Beýanaty kabul etdiler
Merkezi Aziýanyň bäş ýurdy we Latwiýa ulag we logistika ulgamynda hyzmatdaşlyk hakynda bilelikdäki Beýanata gol çekdiler. Dabara, duşenbe güni Latwiýa bilen Merkezi Aziýa sebitiniň döwletleriniň arasyndaky ulag boýunça bäş iş toparynyň egindeş başlyklarynyň ikitaraplaýyn we köptaraplaýyn gepleşikler geçirip, hyzmatdaşlygyň meselelerini hem-de geljegini ara alyp maslahatlaşyp, birnäçe ylalaşyklar gazananylandan soň, 12-nji iýunda Rigada geçirildi.
Bu duşuşyklaryň netijesinde Türkmenistanyň Ministrler Kabinetiniň ýanyndaky Ulag we kommunikasiýalar agentliginiň, Latwiýa Respublikasynyň Gatnawlar ministrliginiň, Gazagystan Respublikasynyň Senagat we infrastruktura ösüş ministrliginiň, Özbegistan Respublikasynyň ulag ministrliginiň, Gyrgyz Respubikasynyň Ulag we kommunikasiýalar ministrliginiň hem-de Täjigistan Respublikasynyň Ulag ministrliginiň wekilleriniň gol çeken Bilelikdäki Beýanaty ylalaşyldy.
Resmi beýannamada durnukly söwdany, ykdysady ösüşi hem-de abadançylygy ilerletmek üçin binýat hökmünde Ýewropanyň we Aziýanyň arasynda halkara söwdasyny we arabaglanyşygy üpjün etmekde ulagyň we logistikanyň möhüm orny nygtaldy.
Merkezi Aziýanyň we Ýewropa Bileleşiginiň arasynda intermodal we multimodal serhetüsti hem-de üstaşyr ulag hyzmatlaryny goldamak, şeýle hem Baltika deňziniň multimodal geçelgesiniň üsti bilen Merkezi Aziýa ýurtlary üçin Ýewropa Bileleşigine ýükleri ibermegiň halklaryny pugtalandyrmak we giňeltmek üçin dürli gündelik hem-de ýüze çykýan meseleler göz öňünde tutuldy.
Şeýle hem Beýanatda, awtomobil, demirýol, port, awiasiýa, poçta hyzmatlaryny hem-de elektron täjirçilik hyzmatlaryny, şol sanda Latwiýanyň ulag- logistika düzümleriniň üsti bilen Merkezi Aziýadan Demirgazyk we Günbatar Ýewropa harytlary paýlamak üçin mümkinçilikleri ulanmak arkaly Merkezi Aziýanyň Ýewropa Bileleşigi, Beýik Britaniýa, Demirgazyk Amerika, Latyn Amerikasy we Afrika bilen arabaglanyşygy üpjün etmekde Latwiýanyň logistika hyzmatlarynyň mümkinçilikleri ykrar edildi.
Alty ýurt, Ýewropanyň we Aziýanyň arasynda utgaşykly ulag ugurlaryny we arabaglanyşygy ösdürmek we gowulandyrmak maksat edinýän ikitaraplaýyn we köptaraplaýyn platformalary peýdalanmak bilen hyzmatdaşlygy pugtalandyrmak barada ylalaşdy. Şeýlelikde, Latwiýada we Merkezi Aziýada harytlaryň we hyzmatlaryň söwdasyny ösdürmäge ýardam bermek, oba hojalygyna, tebigy serişdelere hem-de umumy ýük gatnatmalara, şeýle hem adamlaryň arasynda gatnaşyklary goldamak we giňeltmek üçin tagallalara aýratyn üns berildi.
Ondan başga-da Beýanatda söwda, maýa goýum we işewürlik hyzmatdaşlygyny giňeltmek bilen, Ýewropanyň we Merkezi Aziýanyň hem-de has giň görnüşde Aziýanyň arasynda söwda gatnaşyklaryny pugtalandyrmak maksady bilen, Latwiýada we Merkezi Aziýada ulag we logistika hyzmatlarynyň ösdürilmegine, ammarlaryň, önümçilik we senagat kuwwatlyklarynyň döredilmegine ýardam bermek hakda aýdyldy.
ORIENT news
