Koreý alymlary Magtymgulynyň döredijiligine gyzyklanma bildirýärler
Klassiki şahyr Magtymguly Pyragynyň doglan gününiň 300 ýyllygyna bagyşlanan türkmen-koreý halkara ylmy we döredijilik «Magtymguly Pyragy we dünýä gymmatlyklary» konferensiýasy anna güni Koreýa Respublikasyndaky Türkmenistanyň ilçihanasy tarapyndan gurnaldy.
Türkmenistanyň Daşary işler ministrliginiň saýtynda habar berlişi ýaly, onlaýn görnüşde geçirilen foruma Koreýanyň öňdebaryjy ýokary okuw mekdepleriniň – Hanýang uniwersitetiniň, Koreýanyň Ýewraziýa syýasaty öwreniş institutynyň, Peje uniwersitetiniň, Çongnam milli uniwersitetiniň, Seul milli uniwersitetiniň, Inha uniwersitetiniň, Hankuk daşary ýurt dilleri uniwersitetiniň, Kukmin uniwersitetiniň ýolbaşçylary, professorlary, mugallymlary we hünärmenleri gatnaşdylar.
Bu seminarda Türkmenistana Ylymlar akademiýasynyň ylmy işgärleri, Magtymguly adyndaky Türkmen döwlet uniwersitetiniň, S. Seýdi adyndaky Türkmen döwlet mugallymkçylyk institutynyň mugallymlary we talyplary, şeýle hem iki ýurdyň ylmy-gözleg jemgyýetleriniň wekilleri wekilçilik etdi.
Hanýang uniwersitetiniň Aziýa-Ýuwaş umman sebitiniň gözleg merkeziniň müdiri, professor Om Gu öz çykyşynda koreý gözlegçileriniň we dünýäniň dürli künjeklerinden alymlaryň türkmen şahyry Magtymgulynyň durmuşyny we döredijiligini öwrenmek isleýändigini belledi.
Maslahata gatnaşyjylar öz çykyşlarynda Gündogaryň beýik şahyry Magtymguly Pyragynyň döredijilik mirasynyň öz döwrüniň döredijilik adamlarynyň we alymlarynyň pikirlerini birleşdirendigini nygtadylar. Şahyryň goşgy ýygyndylarynyň koreý we dünýäniň beýleki dillerine terjime edilmeginiň halkara ylmy jemgyýetçiligine türkmenleriň taryhyny we edebiýatyny öwrenmekde möhüm goldaw berjekdigi bellendi.
ORIENT news
