Reňkli türkmen halylary, täze model Lada Aura, gün we ýadro desgalary - Soçide «Ýewraziýa – biziň öýümiz» Sergisi açyldy
Soçidäki «Sirius» ylym we sungat seýilgähiniň çäginde «Ýewraziýa –biziň öýümiz» sergisi açyldy. Ol, 7-nji iýundan 9-njy iýun aralygynda federal çäklerde geçiriljek Ýewraziýa hökümetara geňeşiniň mejlisine bagyşlanýar. GDA ýurtlarynyň we EAEU-nyň wekilleri ýedi müň inedördül metrden gowrak meýdany eýeleýän sergä baryp gördüler diýip, «Mir 24» habar berýär.
Türkmenistan elde dokalýan reňkli halylary bilen hemmäni haýran galdyrdy. Stend türkmen senetçileri tarapyndan dokalan ýüpek, ýüň we beýleki görnüşli halylar we haly önümleri bilen bezeldi. Türkmenistanyň Senagat we gurluşyk materiallary ministrligi, Dokma senagaty ministrligi, «Türkmenhimiýa» döwlet konserni we ýurdumyzyň Senagatçylar we telekeçiler birleşmesi öz önümlerini hödürlediler.
Özbegistan gün elektrik stansiýasy taslamasyny hödürledi. Russiýanyň «AvtoVAZ» konserni Lada Aura täze awtoulag modelini hödürledi. Bilermenler serginiň çäginde awtoulagyň giňeldilen görnüşiniň wezipeli işgärler üçin gowy ulanylyp bilinjegini we hatda «Aurus» bilen hem bäsleşip biljegini aýtdylar.
«Rosatom» döwlet korporasiýasynyň stendinde wekiliýetleriň ýolbaşçylaryna dünýäniň iň ýaş we iň täsirli zawody - Russiýa- Belarusyň ýadro desgasynyň bilelikdäki taslamasy barada gürrüň berildi. Häzirki wagtda birinji blok eýýäm işe girizildi, ikinjisi synagdan geçirilýär.
Şeýle hem sergide Russiýa Federasiýasynyň Döwlet hasaba alyş, kadastr we kartografiýa federal gullugy (Rosreýestr) GDA giňişlik maglumat infrastrukturasy geoportalynyň iş prototipini görkezdi. Onuň 2025-nji ýylda işe girizlmegine garaşylýar. Bu, Arkalaşygyň ýurtlarynyň döwletara giňişlik maglumatlaryny, dostlukly ýurtlaryň düýbünden programma üpjünçiliginden garaşsyz bir sanly platformada birleşdirýän ilkinji taslama.
Hususan-da, raýatlaryň we kärhanalaryň aýratyn durmuş ýagdaýlaryny çözmäge gönükdirilen geoportalda döredilmegi meýilleşdirilýän elektron hyzmatlarynyň demo görnüşleri görkezilýär. Bu ýerde GDA ýurtlarynda ýokary bilim almak ýa-da iş tapmak, döwletara maýa goýum maksatlary üçin çäkleri saýlamak we syýahatçylyk ugurlary gurmak bilen baglanyşykly ýagdaýlar barada gürrüň edilýar.
ORIENT news
