TAPI taslamasy ýakyn wagtda ýerine ýetiriler — Pakistanyň resmisi
Pakistanyň nebit we serişdeler hemişelik komitetiniň başlygy Abdul Kadyr «Türkmenistan — Owganystan — Pakistan — Hindistan» magistral gaz geçirijisiniň taslamasynyň ýakyn wagtda ýerine ýetiriljekdigini beýan etdi – diýip, Daily Times habar berýär.
Pakistanly resmi şahsyň sözlerine görä, TAPI taslamasyny tizleşdirmek boýunça golaýdaky bilelikdäki ylalaşyk geleşigiň ähli gatnaşyjylary üçin oňyn duýduryş bolup durýar, olar hem, öz gezeklerinde, bu gaz geçirijisiniňň gurluşygyny tamamlamak üçin ähli bar bolan serişdelerini ulanmalydyrlar.
Ol Pakistanyň energiýany import etmek mümkinçiliginiň üstünde işlemeginiň zerurdygyny, bar bolan taslamalaryň ýerine ýetirilmeginiň tizleşdirilmegi üçin ähli tagallalary etmelidigini belledi, Türkmenistan bilen öňden gelýän aýratyn medeni-taryhy gatnaşyklaryň bardygyny nygtady.
Şeýle hem Abdul Kadyr gaz geçirijisiniň işe girizilmeginiň bu taslama gatnaşýan ýurtlaryň ykdysady gülläp ösmegini üpjün etjekdigine ünsi çekdi.
ORIENT habarlar
