Astana 2023-nji ýylda sambo boýunça Aziýanyň we Okeaniýanyň çempionatyny kabul eder
Gazagystanyň paýtagty 2023-nji ýylyň sambo boýunça Aziýanyň we Okeaniýanyň çempionatyny kabul eder. Ýaryşlar 7-nji iýundan 11-nji iýun aralygynda «Bilaýn Arenada» ulularyň, ýetginjek oglanlaryň we ýetginjek gyzlaryň, oglanlaryň we gyzlaryň arasynda, şeýle hem ussatlaryň arasynda geçer.
Çärä ilkinji gezek körler we çala görýänler gatnaşarlar.
«Bu ýyl taryhda ilkinji gezek körleriň we çala görýänleriň arasynda Aziýanyň we Okeaniýanyň çempionaty geçiriler, oňa bütin dünýäden türgenler gatnaşarlar. Sambonyň halkara federasiýasy biziň sportumyzyň görnüşine mümkinçiligi çäklendirilen adamlary çekmäge we olary uýgunlaşdyrmaga, halkara ýaryşlary üçin mümkinçilikleri döretmäge has köp üns berýär. Eýýäm ýakyn wagtda beýleki yklymlaýyn federasiýalaryň biziň tejribämizi kabul edip aljakdyklaryna ynanýaryn – diýip, Sambonyň halkara federasiýasynyň wise-prezidenti, Aziýanyň Sambo boýunça birleşmesiniň baştutany Alamjon Mullaýew belledi.
Ýaryşa Türkmenistandan başga-da, Awstraliýa, Owganystan, Bangladeş, Gonkong, Hindistan, Indoneziýa, Iordaniýa, Eýran, Gazagystan, Koreýa, Gyrgyzystan, Malaýziýa, Mongoliýa, Nepal, Täze Zelandiýa, Palestina, Filippinler, Saud Arabystany, Täjigistan, Tailand, Özbegistan, Ýaponiýa ýaly ýurtlaryň hem wekilleriniň gatnaşmagyna garaşylýar.
Türgenleriň ýaryşa hasaba alynmagy FIAS elektron ulgamy arkaly amala aşyrylýar.
ORIENT habarlar
