Ermenistanda Türkmenistanyň Medeniýet günleri açyldy
Ýerewandaky Aram Haçaturýan adyndaky konsert zalynda Türkmenistanyň Ermenistandaky Medeniýet günleriniň açylyş dabarasy boldy – diýip, ýurtdaky türkmen ilçihanasy habar berýär. Dabara medeniýet we sungat işgärleri, taryhçylar, sungaty öwrenijiler, şeýle hem KHBS-niň wekilleri gatnaşdylar.
Birinji güni Türkmenistanyň Ylymlar akademiýasynyň Golýazmalar institutynyň işgärleri dünýädäki iň uly muzeýleriň birine – Ýerewandaky Mesrop Maştoş adyndaky gadymy golýazmalaryň saklanýan merkezine baryp gördüler. Onda 17 müňden gowrak golýazma we gadymy resminamalaryň 100 müňden gowragy saklanýar. Muzeý Ermenistanyň iri ylmy-barlag institutlarynyň biridir.
Öz gezeginde, türkmen sazandalary Ermenistanyň jemgyýetçilik telewideniýesiniň «Ertiriňiz haýyrly bolsun» programmasyna gatnaşdylar we ermeni tomaşaçylarynyň öňünde konsert bilen çykyş etdiler.
Medeniýet günleriniň çäklerinde Türkmenistanyň we Ermenistanyň medeniýet ministrleriniň duşuşygy boldy, onuň netijesinde iki ýurduň hökümetleriniň arasynda 2023-2025-nji ýyllarda medeniýet babatynda hyzmatdaşlygy ösdürmek hakyda Ylalaşyga gol çekildi.
ORIENT habarlar
