Türkmenistanyň Daşary söwda düzgüni barada Ähtnamany işläp düzmek boýunça Iş topary döredildi
Türkmenistanyň Bütindünýä Söwda Guramasyna agza bolmagy bilen bagly meseleleri utgaşdyrmak maksady bilen, ýurdumyzyň daşary söwda düzgüni barada Ähtnamany işläp düzmek boýunça iş topary döredildi. Degişli Karara Prezidentimiz Serdar Berdimuhamedow anna güni geçirilen hökümet mejlisinde gol çekdi.
Resminamanyň taslamasy Bütindünýä Söwda Guramasynyň (BSG) ýokary derejeli wekiliýetiniň Aşgabada iş saparynyň netijeleri barada hasabat beren wise-premýer Hojamyrat Geldimyradow tarapyndan hödürlendi.
BSG-niň wekilleri Merkezi bankda we Daşary ykdysady gatnaşyklar bankynda birnäçe döwlet gurluşynyň - maliýe we ykdysadyýet, daşary işler, söwda we daşary ykdysady gatnaşyklar ministrlikleriniň ýolbaşçylary bilen duşuşyklary geçirdiler, gepleşikleriň barşynda hyzmatdaşlygyň geljekki ugurlary ara alnyp maslahatlaşyldy.
Türkmenistan 2022-nji ýylyň fewral aýynda Bütindünýä Söwda Guramasyna goşulýan ýurt statusyny aldy.
ORIENT news
