Türkmenistanyň Söwda ministri we Gruziýanyň premýer-ministri söwda dolanyşygyny ösdürmegiň ýollaryny ara alyp maslahatlaşdylar
Türkmenistanyň Söwda we daşary ykdysady aragatnaşyklar ministri Begenç Goçmollaýew duşenbe güni Tbiliside Gruziýanyň premýer-ministri Irakliý Garibaşwili bilen duşuşdy.
Gruziýa hökümetiniň administrasiýasynyň habaryna görä, duşuşykda taraplar daşary söwda nukdaýnazaryndan bar bolan mümkinçiliklere ünsi jemlediler we ikitaraplaýyn söwdany ösdürmek üçin zerur çäreleri ara alyp maslahatlaşdylar.
Olar energetika pudagynda Gruziýa bilen Türkmenistanyň arasyndaky "möhüm hyzmatdaşlygy" bellediler. “Syýahatçylyk pudagyndaky hyzmatdaşlyk hem ara alnyp maslahatlaşylan meseleleriň arasynda boldy. Ikitaraplaýyn syýahatçylyk akymlarynyň mundan beýläk-de ösdürilmegine taýýarlyk tassyklanyldy” – diýlip, habarda bellenilýär.
Duşuşyga iki ýurduň maliýe we ykdysady edaralarynyň wekilleri, şeýle-de Türkmenistanyň Gruziýadaky we Gruziýanyň Türkmenistandaky ilçileri hem gatnaşdylar.
5-6-njy iýunda Tbiliside Ykdysady hyzmatdaşlyk boýunça türkmen-gruzin hökümetara toparynyň mejlisi geçirilýär.
ORIENT news
