Maliýe we ykdysadyýet ministrliginde Bütindünýä bankynyň Türkmenistandaky hemişelik wekili bilen duşuşyk geçirildi
Maliýe we ykdysadyýet ministri Serdar Joraýew BB-nyň wekiliýetiniň baştutany bolup Aşgabada gelen Bütindünýä bankynyň (BB) Türkmenistandaky we Gazagystandaky täze hemişelik wekili bilen duşuşyk geçirdi.
Taraplar Türkmenistanyň we Bütindünýä bankynyň ikitaraplaýyn hyzmatdaşlyga täze itergi bermek üçin mundan beýläkki bilelikdäki hereketleri baradaky resminamanyň taýýarlanmagyny ara alyp maslahatlaşdylar.
Türkmenistanyň Maliýe we ykdysadyýet ministrliginiň baştutany COVID-19 jogap gaýtarmak taslamasynyň çäklerindäki üstünlikli hyzmatdaşlygy mysal getirip, BB bilen özara gatnaşyklaryň oňyn dinamikasyny belledi. Ol miweçiligi we ekerançylygy ösdürmek babatynda, şeýle hem Bütindünýä söwda guramasyna girmek boýunça alnyp barylýan işler babatynda ýurdumyzyň kanunçylygyny kämilleşdirmek boýunça bilelikdäki işler üçin mümkinçilikleriň bardygyny nygtady.
Bütindünýä bankynyň Türkmenistandaky täze hemişelik wekili görkezilen ugurlarda hyzmatdaşlygy işjeňleşdirmek üçin taýýardygyny belledi. BB-nyň milli kanunçylygy seljermek we kämilleşdirmek üçin tehniki maslahatlary bermäge, şeýle hem oba hojalygy babatdaky taslamalary maliýeleşdirmäge mümkinçilikler bardyr – diýip, Mihnew nygtady.
Bulardan başga-da, taraplar Türkmenistanyň Bütindünýä bankynyň sebitleýin taslamalaryna gatnaşmagyny, şeýle hem dürli pudaklaryň hünärmenleri üçin tehniki maslahatlaryň berilmegini ara alyp maslahatlaşdylar. BB-nyň daşky gurşawy goramaga gönükdirilen başlangyçlary goldamakda gyzyklanýandygy bellenildi.
ORIENT habarlar
