Türkmenbaşyly ýaş bagşy Bakuda geçirilen çagalar mukam festiwalynda birinji ýeri eýeledi
20-nji maýda Baku şäherinde XIII Halkara çagalar mukam festiwaly geçirilip, oňa ýedi ýurtdan gelen zehinli çagalar ýygnandy. Türkmenistan, däp bolşy ýaly, bu ýyl hem çagalaryň aýdym-saz döredijiliginiň forumyna gatnaşdy - bu ýyl ýurdumyza milli ýerine ýetiriş sungaty däpleriniň üç mirasdüşeri wekilçilik etdi.
Festiwalyň netijelerine görä, Balkan welaýatynyň Türkmenbaşy şäherindäki çagalar çeperçilik mekdebiniň 5-nji synp okuwçysy Söýün Orazdurdyýew 1-nji ýeri eýeledi we diplom hem-de pul baýragy bilen sylaglandy. Şeýle hem, oňa Azerbaýjan Respublikasynyň Medeniýet ministriniň adyndan ýörite diplom gowşuryldy.
Söýün birinji ýeri türkiýeli ýaşytdaşy bilen paýlaşdy, festiwalyň gran-pri baýragy bolsa azerbaýjanly ýaş sazanda gowşuryldy. 2-nji ýere Eýrandan we Özbegistandan gelen iki bagşy, üçünji orna gazagystanly, gyrgyzystanly we azerbaýjanly zehinleriň üçüsi mynasyp boldular.
Mundan başga-da, Maýa Kulyýewa adyndaky Türkmen milli konserwatoriýasynyň ýanyndaky ýörite aýdym-saz mekdep-internatynyň 8-nji synp okuwçysy Sähetnazar Garaýew Azerbaýjanyň Yaşlar we sport ministriniň diplomy bilen sylaglandy.
Festiwal Azerbaýjanyň Medeniýet we syýahatçylyk ministrliginiň we beýleki pudaklaýyn edaralarynyň goldawy bilen Kainat Ýaşlar merkezi tarapyndan halk aýdym- sazynyň nusgawy žanrlaryny gorap saklamak, ýaş zehinleri ýüze çykarmak, halkara medeni alyş-çalyş we ýaş nesliň arasynda döredijilik aragatnaşygyny höweslendirmek maksady bilen gurnaldy.
Ýeri gelende aýtsak, 18-nji iýundan 25-nji iýuna çenli Azerbaýjanda uly ýaşly zehinleriň gatnaşmagynda “Mukam dünýäsi” VI halkara festiwaly geçiriler.
ORIENT news
