Türkmen-rus uniwersitetiniň taslamasy ylalaşyk tapgyrynda - Russiýa Federasiýasynyň Daşary işler ministrligi
Aşgabatda bilelikdäki türkmen-rus uniwersitetini döretmek taslamasy ylalaşyk tapgyrynda – diýip, Russiýa Federasiýasynyň Daşary işler ministriniň orunbasary Mihail Galuzin Tomsk döwlet uniwersitetinde geçirilýän “Waldai” halkara diskussiýa klubynyň üçünji Merkezi Aziýa maslahatynda aýtdy. (TDU).
Şeýle-de, Galuzin 2023-2024-nji okuw ýylynda Russiýanyň Merkezi Aziýa ýurtlaryndan gelýän talyplar üçin kwota sanyny artdyrjakdygyny aýtdy. Onuň sözlerine görä, häzirki wagtda Russiýa Federasiýasynda bu sebitden, takmynan 185,000 talyp okaýar, olaryň 68,000 golaýy Russiýanyň býujeti tarapyndan maliýeleşdirilýär.
Mundan başga-da, Russiýanyň öňdebaryjy uniwersitetleriniň Türkmenistanda, Gyrgyzystanda we Özbegistanda şahamçalaryny açmak meýilleşdirilýär – diýip, Galuzin habar berdi.
Türkmen-rus bilelikdäki uniwersiteti döretmek barada ylalaşyk 2022-nji ýylyň iýun aýynda Moskwada Prezidentler Serdar Berdimuhamedow bilen Wladimir Putiniň arasynda geçirilen gepleşiklerde gazanyldy.
Geçen ýylyň noýabr aýynda türkmen-rus uniwersitetiniň gurluşygynyň Aşgabatda 2023-nji ýylda başlajakdygy mälim boldy.
ORIENT news
