Türkmenistanda 2023-nji ýylda galla oragyny guramaçylykly geçirmek boýunça döwlet topary döredildi
Türkmenistanda 2023-nji ýylda galla oragyny guramaçylykly geçirmek boýunça döwlet topary döredildi.
Galla oragyny guramaçylykly geçirmek boýunça döwlet toparyny döretmek we onuň düzümini tassyklamak barada Karara Prezident Serdar Berdimuhamedow türkmen hökümetiniň şenbe güni geçirilen mejlisinde gol çekdi.
Şeýle hem, resminama laýyklykda, Oba hojalyk we daşky gurşawy goramak ministrligine ýerlerde däne kombaýnlaryna tehniki hyzmat etmek işlerini talabalaýyk guramak arkaly orak möwsüminde olaryň öndürijilikli we bökdençsiz işledilmegini üpjün etmek tabşyryldy.
Ministrler Kabinetiniň ýanyndaky Ulag we kommunikasiýalar agentligi Oba hojalyk we daşky gurşawy goramak ministrligi bilen şertnama baglaşmak esasynda ýygnalan bugdaý hasylynyň meýdanlardan kabul ediş nokatlaryna, ammarlara we elewatorlara wagtynda hem-de ýitgisiz daşalmagyny üpjün etmäge borçly edildi.
Oba hojalyk we daşky gurşawy goramak ministrligine bugdaýy kabul ediş nokatlaryna daşamakda beýleki edaralaryň, şol sanda hususy eýeçilikdäki awtoulag serişdelerini şertnama esasynda peýdalanmaga ygtyýar berildi.
ORIENT news
