Türkmenistanyň Bilim ministri Bütindünýä bilim forumyna gatnaşar
Türkmenistanyň Bilim ministri Gurbangül Ataýewa bilim ulgamyna bagyşlanan Bütindünýä forumyna gatnaşar. Bu barada ministriň Beýik Britaniýanyň Türkmenistandaky ilçisi Lýusiýa Uaýld bilen söhbetdeşliginiň barşynda belli boldy – diýip, britan diplomatik wekilhanasy habar berýär.
Bilim boýunça bütindünýä forumy – dünýä bilim ulgamynyň esasy meselelerini maslahatlaşmak üçin her ýylda geçirilýän uly meýdançadyr. 2022-nji ýylda oňa dünýäniň ýurtlarynyň bilim ulgamlarynyň 116 ministri we ýolbaşçysy gatnaşdy.
Forum 7-nji maýdan 10-njy maý aralygynda Londonda geçer. Onuň geçirilmegi täze britan şasyna täç geýdirilmegine bagyşlanan dabaralar bilen gabat gelýär. Forumyň meýdançasynda çekişmeleriň çäginde oňa agza ýurtlaryň bilim bölümleri bilen işewür gatnaşyklaryň ýola goýulmagy meýilleşdirilýär.
ORIENT habarlar
