Nemes kompaniýasy Türkmen-german uniwersitetini açmagy teklip edýär
Türkmenistan amatly geografiki ýerleşişi sebäpli, sebit we kontinental ähmiýetli ulag we üstaşyr merkez hökmünde bellidir. Bilermenleriň köpüsiniň pikiriçe, häzirki wagtda Aziýa bilen Ýewropanyň arasyndaky söwdanyň iň ösen bazaryna öwrüler, bu bolsa serhetaşa ýük akymyny döredip biljek ýurtlar üçin örän amatly we bähbitli bolar – diýip, MTS halkara ulag-logistika kompaniýasynyň (Gamburg, GFR) ýolbaşçysy Azgarhil Mangal Aşgabatda geçirilen ITTC – 2023 maslahatynda aýtdy.
Türkmenistanyň ykdysadyýetinde Ýewropa ýurtlary we esasanam Germaniýa bilen bar bolan ykdysady gatnaşyklaryň mümkinçilikleri ägirt uly orna eýedir. Soňky 5 ýylda Germaniýadan Türkmenistana eksport köp esse artdy, muňa statistiki maglumatlar şaýatlyk edýär: geçen ýyl eksport 209 million ýewro, Türkmenistandan Germaniýa import bolsa - 35 million ýewro deň boldy. 2022-nji ýylda Ýewropadan Türkmenistana import, takmynan 634 million ýewro, Ýewropa eksport - 417 million ýewro deňdir. Gamburg kompaniýasynyň başlygy şeýle maglumatlary berdi.
Bu görkezijileriň gazanylmagynda ulag we üstaşyr-logistika infrastrukturasy uly orun eýeleýär. Ulag pudagyna maýa goýum ykdysady taýdan maksadalaýyk we täze iş ýerleriniň döredilmegine ýardam edýär. Goşmaça ulag merkezleriniň gurulmagy bolsa Türkmenistany sebitdäki iň uly logistika merkezleriniň birine öwürer. Bu ýerde maýa goýumlarynyň "bir taraplaýyn" bolmaly däldigini bellemek möhümdir, Germaniýanyň ýokary tehnologiýaly potensialyny we Türkmenistanyň bar bolan ykdysady çeşmelerini deň derejede ulanmak zerur – diýip, Azgarhil Mangal sözüni dowam etdi.
Şunuň bilen baglylykda, nemes telekeçisi türkmen tarapyna Aşgabatda Türkmen-nemes uniwersitetini, şeýle hem okuwlary “amaly-tejribe-önümçilik” ýörelgesi boýunça guraljak Logistika ylmy-önümçilik merkezini açmagy teklip etmek isleýändigini mälim etdi. Bu bilim edaralary Türkmenistan üçin hünärmen taýýarlamakda goltgy bolar. Gürrüň ykdysadyýet, energetika, ulag we maglumat tehnologiýalary ugurlary boýunça halkara derejeli, iki dil bilýän hünärmenleri taýýarlamak barada barýar. MTS kompaniýasynyň ýolbaşçysynyň aýtmagyna görä, täze bilim edaralary nemes we türkmen hünärmenleriniň gatnaşmagynda geçiriljek tegelek stollaryň, maslahatlaryň, forumlaryň, okuw seminarlarynyň geçiriljek meýdançasyna öwrülip biler.
ORIENT news
