Russiýanyň demir ýollary Türkmenistana ýük daşamagyň mukdaryny 73 göterim, üstaşyr geçişini bolsa 3,5 esse artdyrdy
«Biz türkmen kärdeşlerimiz bilen güýçli, uzak möhletli we dowamly hyzmatdaşlygyň mundan beýläk-de ösdürilmegine uly ähmiýet berýäris», - diýip «RŽD» AGPJ-yň baş müdiriniň birinji orunbasary Sergeý Pawlow aýtdy. Ol Prezidentimiz Serdar Berdimuhamedowyň geçen ýylyň iýul aýynda Russiýa Federasiýasyna eden saparynyň bu gatnaşyklara güýçli itergi berendigini nygtady.
Pawlow Aşgabatda ulag we üstaşyr geçelgeleri boýunça geçirilen halkara konferensiýada çykyş edip, syýasat resminamalarynyň çäginde bilelikdäki işleriň hatarynda Demirgazyk-Günorta geçelgesiniň gündogar şahasy boýunça daşamalaryň ösüşini, infrastruktura taslamalaryny, işgärleri taýýarlamak we pudagyň sanly özgerişleri boýunça işleri atlandyrdy.
Mysal hökmünde, Gyzylarbatda wagon abatlaýyş zawodyny döwrebaplaşdyrmak boýunça synag taslamasyny agzady. Bu meseläniň çözgüdi bu kärhananyň kuwwatyny birnäçe gezek ýokarlandyrmaga we häzirki zaman derejesine çykarmaga mümkinçilik berer.
Şeýle hem, Russiýanyň demir ýollary elektrikleşdirmek, sebitdäki ýolagçy otlusynyň tizligini ösdürmek üçin birnäçe taslamany teklip edýär, ähli işewürlik işlerini awtomatlaşdyrmak we Türkmen demir ýollaryny sanlaşdyrmak boýunça teklipler işlenip düzülýär.
Geçelgeler barada aýdyp, Sergeý Pawlow Russiýa Federasiýasynyň Demirgazyk-Günorta geçelgesi boýunça daşary söwda daşamalarynyň geçen ýylda 62 göterim, 2023-nji ýylyň birinji çärýeginde 70 göterim ýokarlandygyny belledi.
Şeýle hem, onuň aýtmagyna görä, şu ýylyň birinji çärýeginde Russiýadan Türkmenistana ýük daşamagyň mukdarynyň 73 göterim ýokarlanandy. Türkmenistanyň üsti bilen üstaşyr daşamalar 3,5 esse ýokarlandy.
ORIENT news
