Daşoguz welaýatynda abatlaýyşdan soňra atçylyk-sport toplumy gaýtadan ulanyşa berildi
Daşoguz welaýatynda abatlaýyşdan soňra atçylyk-sport toplumy ýene açyldy – diýip, Türkmenistanyň Döwlet habarlar agentliginiň saýty habar berýär. Bu wakanyň hormatyna toplumyň çäginde dabaraly çäreler we at çapyşyklary geçdi.
Meýdany 50 ga-dan gowrak bolan atçylyk-sport toplumy dürli maksatly 38 desgadan ybarat şäherçä öwrüldi. Olar atlary saklamak we atly sport ýaryşlaryny geçirmek üçin ähli gerekli zatlar bilen üpjün edilendir. 50 at üçin dört sany atýatak, manež, türgenleşik meýdançasy, atlary ýuwundyrmak üçin howuz, karantin üçin we olara gerekli weterinar kömegini bermek üçin bölüm guruldy.
3 müň tomaşaça niýetlenen toplumyň çäginde şeýle hem dabaralary geçirmek üçin zal, awtoduralga, çagalar we sport meýdançalary, tomusky amfiteatr we maslahatlar zaly göz öňünde tutulypdyr.
Abatlamagyň çäklerinde çapuw ýodajygy täzeden çekildi. Şeýlelikde, ol çagylyň we üwelen gumuň birnäçe gatlary bilen dykyzlandyryldy. Ýodajygyň üstünden ýokary tehnologiýaly we amatly geotekstil düşeldi we kwars çägesi bilen örtüldi. Ahal welaýatyndan getirilen materiallar toýnaklaryň urgusyny ýumşatmaga ýardam edip we haýwanyň bedenine düşýän agramy azaldyp, ýeriň gowy amortizirlenmegini üpjün eder. Bu örtük uzak wagtlap hyzmat edip bilýär we ýokarky dartylmanyň uly güýjüne eýedir.
Toplumyň çäkleriniň dürli güller, agaç nahallary we gyrymsy agaçlar bilen abadanlaşdyrylandygy bellenmäge mynasypdyr.
ORIENT habarlar
