Özbegistanyň täze Konstitusiýasy ýurduň ösüşine ýardam eder – Serdar Berdimuhamedow
Prezident Serdar Berdimuhamedow özüniň özbek kärdeşi Şawkat Mirziýoýewi Özbegistanyň Konstitusiýasyna üýtgetmeleri we goşmaçalary girizmek boýunça sala salşygyň üstünlikli geçirilmegi bilen gutlady, bu Türkmenistanyň baştutanynyň belleýşi ýaly, goňşy ýurduň ösüşine ýardam eder.
Serdar Berdimuhamedow öz gutlagynda Özbegistanyň raýatlarynyň sala salşyga işjeň gatnaşmagynyň ýurduň baştutanynyň giňden goldanylýandygyna we amala aşyrylýan özgertmelere doly düşünýändiklerine şaýatlyk edýändigini belledi.
Prezident sala salşygyň açyklyk ýagdaýynda we demokratik ýörelgeleriň esasynda geçendigini nygtady. Ol şeýle hem türkmen-özbek hyzmatdaşlygynyň mundan beýläk giňeldilmegine ygrarlydygyny beýan etdi.
Şawkat Mirziýoýewe we Özbegistanyň halkyna gutlag sözlerini şeýle hem Türkmenistanyň Halk Maslahatynyň Başlygy Gurbanguly Berdimuhamedow hem iberdi.
«Özbegistanyň işjeň halkara gatnaşyjy bolmak bilen, dünýäniň syýasy giňişliginde öz işlerini täze gujur-gaýrata esaslanyp dowam etdirjekdigini, häzirki döwürde ählumumy gün tertibinde durýan möhüm meseleleri çözmäge gönükdirilen täze garaýyşlary öňe sürjekdigini berk ynam bilen aýdyp bilerin» - diýlip, türkmen halkynyň Milli Lideriniň iberen gutlag hatynda aýdylýar.
ORIENT habarlar
