Kuştdepdi hakda gysga gürrüň Moskwada geçirilen ýaryşda Türkmenistanly talyba ýeňiş getirdi
Moskwa döwlet pedagogika uniwersitetinde (MPGU) bilim alýan Türkmenistanly talyp Narina Kiselýowa «Dünýä öz Watanyň hakda gürrüň ber» atly V halkara bäsleşiginde ýeňiji boldy.
Taslama gatnaşyjylara mowzukly görkezişler ýa-da wideolar arkaly bütin dünýäniň adamlarynyň öz adatlary, däp-dessurlary, ýurtlarynyň, şäherleriniň we şäherçeleriniň esasy gözel ýerleri barada gürrüň bermäge mümkinçilik berdi.
Dört ýaş kategoriýasyna bölünen bäsleşige 35 ýurtdan we Russiýanyň 89 sebitinden 6000 töweregi adam gatnaşdy.
Türkmenistanly gyz, ýaryşyň düzgünlerine laýyklykda 90 sekuntda milli tans kuştdepdi barada gürrüň berýän wideony emin agzalaryna hödürläp, iň kiçi ýaş kategoriýasynda ýeňiji boldy.
– Umuman aýdanymda, men ugrap barýan otla münüp ýetişdim diýsemem bolýar. Sebäbi ýaryşa gatnaşmaga men işleriň kabul edilşigi tamamlanmagyň öňüsyrasynda karar berdim. Gatnaşmak üçin wideo görkeziş taýýarladym, bir günde hemme zady kamera düşürdüm, birnäçe sagadyň içinde montaž etdim, sebäbi möhletler gutaryp barýardy. Ýöne görşüňiz ýaly wagtynda ýetişdim, - diýip ýeňiji ORIENT-e gürrüň berdi. – Aslynda, kynçylyk hem bardy. Sebäbi Türkmenistan hakda tükeniksiz gürrüň berip bilerin. Emma şertleriň görkezişi ýaly ony 90 sekunda ýerleşdirmek maňa mümkin däl ýalydy. Men bu barada şeýle bir alada etdim welin, synanşmaga degermi diýibem şübhelendim. Ýöne şonda-da synanyşdym. Umuman aýdanymda, dörediş işinden başlap baýrak gowşurylyş dabarasyna çenli köp täsir galdyrandygyny aýdyp bilerin.
Narina Kiselýowa, Mary şäherinde doglan Moskwa döwlet pedagogika uniwersitetiniň filologiýa fakultetiniň dördünji ýyl talyby.
Artur PETROSÝANS
