Türkmenistan himiýa önümlerini öndüriji iki sany gazy gaýtadan işleýji täze toplum gurar
Türkmenistanyň tebigy gaz ylmy-barlag instituty ýurduň gündogar we günbatar welaýatlarynda polimer we köp funksiýaly himiki önümleri öndürmek boýunça azyndan iki sany gazy gaýtadan işleýji zawody döretmekligiň üstünde işleýär.
Bu barada «Türkmengaz» döwlet konserniniň tebigy gaz YBI-niň direktory Baýrammyrat Pirniýazow Dubaýda geçýän Türkmenistanyň nebit-gaz pudagyna maýa goýumlary çekmek boýunça Halkara forumyň barşynda aýtdy.
Ylmy barlaglaryň ekologiýa ugruna bagyşlanan hasabatynda institutyň baştutany Türkmenistanda gazy gaýtadan işlemek boýunça işleriň iki esasy ugur boýunça alnyp barylýandygyny, olardan birinjisiniň ýokary tehnologiýaly çözgütleri ulanyp, gerekli infrastrukturany döretmegi göz öňünde tutýandygyny beýan etdi.
Ikinji ugur önümçiligiň diwersifikasiýalaşdyrylmagyna degişlidir, hususan-da – wodorodyň, metanolyň, ammiagyň, karbamidiň, dimetil efiriniň, sintetiki benziniň we sintetiki dizel ýangyjynyň assortimentini we çykarylyşynyň möçberlerini artdyrmakdyr.
Häzirki wagtda Türkmenistanda şuňa meňzeş kärhanalaryň eýýäm birnäçesi hereket edýär. Önümçilikleriň döredilmegi çig malyň gorlarynyň bar bolan Lebap we Balkan welaýatlarynda göz öňünde tutulmagy belläp geçerliklidir.
ORIENT habarlar
