Gazak nebiti Jeýhandan Rumyniýa ugradylyp başlandy
Gazagystanyň nebiti Jeýhan portundan Rumyniýa tarap ugradylyp başlandy – diýip, “KazMunaýGaz” Milli kompaniýasy paýdarlar jemgyýetiniň (MKPJ) metbugat gullugy habar berýär.
80,000 tonna möçberindäki nebitiň ilkinji tapgyry Petromidiýa Nebiti gaýtadan işleýän zawod üçin Rumyniýanyň Konstansa portunda düşer.
Geçen ýylyň ahyrynda “KazMunaýGaz” MKPJ bilen Azerbaýjanyň SOCAR Döwlet nebit kompaniýasynyň arasynda Aktau-Baku-Jeýhan ugry boýunça ýyllyk 1,5 million tonna möçberindäki nebitiň üstaşyr geçirilmegi barada bäş ýyl möhletli ylalaşyk baglaşyldy.
Şu ýylyň mart aýynda gazak nebiti Aktau-Baku ugry boýunça ugradylyp başlandy. Nebiti daşama gazak we azerbaýjan flotlarynyň deň derejede gatnaşmagynda amala aşyrylýar. 20-nji aprele çenli Aktau portundan 86,000 tonna nebit ugradyldy.
ORIENT news
