Özbegistanyň daşary söwda dolanyşygy iň köp bolan GDA ýurtlarynyň arasynda Türkmenistan ilkinji üçlüge girdi
2023-nji ýylyň ýanwar-mart aýlarynda Özbegistanyň GDA ýurtlary bilen daşary söwda dolanyşygy 4,77 milliard dollara ýetdi, şolardan eksportyň mukdary 1,69 milliard dollar, importyň mukdary bolsa 3.07 milliard dollara deňdir.
Arkalaşygyň ýurtlary bilen daşary söwda dolanyşygynyň iň köp möçberi Russiýa (46,9%), Gazagystan (23.2%) we Türkmenistan (5.5%) bilen hasaba alyndy – diýip, Özbegistanyň Statistika gullugyna salgylanýan UzDaily.uz habar berýär. GDA ýurtlarynyň daşary söwda dolanyşygynyň paýy 2022-nji ýylyň degişli döwri bilen deňeşdirilende 1,9% ýokarlandy, 2023-nji ýylyň ýanwar-mart aýlarynyň netijelerine görä, olaryň daşary söwda dolanyşygyndaky paýy bolsa 32,3% deň boldy.
Şu ýylyň ilkinji üç aýynda 2022-nji ýylyň degişli döwri bilen deňeşdirilende, GDA ýurtlarynyň eksportynyň paýy 8,1% artdy, importynyň paýy bolsa 3,5% azaldy we 33,8% deň boldy.
Umuman, 2023-nji ýylyň ýanwar-mart aýlarynyň netijeleri boýunça Özbegistana 155 ýurtdan harytlar we hyzmatlar import edildi. Importyň 2/3 gowragy Hytaý, Russiýa, Gazagystan, Germaniýa, Koreýa Respublikasy, Türkiýe we Türkmenistan ýaly iri hyzmatdaş ýurtlaryň paýyna düşýär.
ORIENT news
