Üstünligiň formulasy – başarnyga köpeldilen wagt birligi: “Ýenme” ýaşlar üçin taslamany durmuşa geçirdi
Durmuşda öz ornuňy tapmak, öz pikiriňi aýdyň beýan etmek we dogry esaslandyrmagy başarmak, söhbetdeşiňi diňlemek we ony eşitmek, hünär saýlamakda dogry çözgüt tapmak - “Ýenme” jemgyýetçilik guramasy tarapyndan durmuşa geçirilen “Üstünlige barýan ýolda” atly taslama gatnaşyjylar bu endikleri kämilleşdirmäge mümkinçilik aldylar.
Guramanyň hünärmenleri ýurtda 2022-nji ýylyň noýabr aýyndan 2023-nji ýylyň aprel aýyna çenli döwür içinde geçirilen bu maksatnamanyň netijelerini jemlediler. “Ýenme” jemgyýetçilik guramasynyň beýleki taslamalarynyň köpüsi ýaly, ol ejiz ýaşlaryň sosial integrasiýasyna, özüne ynamy bolan jogapkär adamlary terbiýelemäge gönükdirilendir.
Okuw maslahatlary ýaşlara öz güýçli taraplaryny we häsiýetlerini ösdürmäge, şeýle hem hünär taýdan öz ykbalyny kesgitlemäge we maksatlaryna ýetmäge mümkinçilik berdi.
"Üstünlikli" taslama ýaşlaryň 30-sy gatnaşdy, olaryň arasynda saglyk ýagdaýy sebäpli mümkinçilikleri çäklendirilen, tejribesiz ýa-da maliýe durnuksyzlygy sebäpli, ýokary bilim almaga mümkinçiligi bolmadyk oglan-gyzlar bar. Olar ýörite okuw seminarlarynyň, treningleriň dowamynda hünär endiklerini kämilleşdirmek, işjeň durmuş ýöretmek üçin amatly şertleri döretmek boýunça okuw kursuny tamamladylar.
Hünärmenler seminarlardan daşary, diňleýjiler üçin maslahat duşuşyklaryny we iş ýarmarkasyny geçirdiler. Tälimçi Madina Mustafina öwretmegiň dürli usullaryny – “beýnä hüjüm” tärini, interaktiw we amaly maşklary ulandy. Okuwlarda ýaşlar karýerasynyň maksatlaryny düzmegi öwrendiler, şeýle hem öz-özüňi, başarnyklaryňy görkezmek gurallaryny dogry ulanmak, wagt dolandyryşy, şahsy maglumat ýazmak we söhbetdeşlik geçmek ýaly başarnyklary özleşdirdiler.
Iş ýarmarkasyna Türkmenistanyň işewür toparlarynyň wekilleri gatnaşdy. Telekeçiler ýaşlar bilen öz tejribelerini paýlaşdylar we olara üstünlik, öz-özüňi ösdürmek we karýera ýoluny döretmek barada maslahatlary berdiler.
“Netije üçin işlemeli. Ol başarnyk bilen köpeldilen wagtyň her birliginden durýar. Bu formula hemişe ýeňiş gazanýar" - diýip, telekeçiler taslama gatnaşyjylara üstünlik arzuw etdiler.
Ýaşlar üçin okuw maksatnamasy “Ýenme” tarapyndan Türkmenistanyň Migrasiýa boýunça halkara guramasynyň Ýewraziýa Gaznasy (EF) we ABŞ-nyň Halkara ösüş agentligi (USAID) bilen hyzmatdaşlykda amala aşyryldy.
ORIENT news
