Türkiýedäki merkeziň üsti bilen gaz satyn almak isleýän Ýewropa ýurtlary agzaldy
Ýewropa ýurtlarynyň birnäçesiniň döredilýän türk gaz merkeziniň üsti bilen gaz satyn almak isleýändigini Türkiýäniň energiýa ministri Fatih Donmez NTV kanalynyň ýaýlymynda habar berdi.
«Biz gaza mätäç Ýewropa ýurtlary bilen aragatnaşyk saklaýarys. Merkez baradaky teklibimizi ilkinji bolup Bolgariýa goldady we biz ýylyň başynda ylalaşyk gazanyp, eltip bermäge başladyk. Demirgazyk Makedoniýadan kärdeşlerimiz hem gaz satyn almaga taýýardyklaryny beýan etdiler - bu gepleşikler dowam edýär. Rumyniýa bilen hem gaty oňyn netijeleri gazandyk. Bu ýurt köpden bäri biziň üstimiz bilen gaz almak isleýär ... Wengriýa, Serbiýa, Bosniýa we Gersegowina hem gaz satyn almak isleýändiklerini aýtdylar», - diýip Dönmez nygtady.
Ministriň sözlerine görä, Türkiýe gaz geçirijileri arkaly we LNG tankerleriniň kömegi bilen ýylda 100 milliard kub metr gaz alýar.
«Biz bu göwrümden 55-60 milliard kub metr ulanýarys, galan 40 milliardyny Ýewropa arkaýyn satyp bileris ... Gürrüň Merkezi Ýewropa ýurtlarynyň birnäçesi barada hem gidýär. Merkeziň üsti bilen berilýän gazy Ýewropanyň gaz paýlaýyş ulgamyna birikdirip bolar», - diýip ministr belledi.
ORIENT news
