Türkmen tennisçisi Aziýanyň çempionatynda kümüş medal gazandy
Türkmen türgeni Ilima Güseýnowa Hindistanyň Bhubaneswarynda geçirilen Aziýanyň çempionatynyň final tapgyrynda kümüş medala eýe boldy. Paýtagtdaky tennis akademiýasynda ýetişdirilen türkmen tennisçisi özbek türgeni Emiliýa Kim bilen jübüt derejede çykyş etdi.
Ilima Güseýnowanyň Merkezi we Günbatar Aziýanyň toparynyň düzüminde gatnaşandygy bellenmäge mynasypdyr, ol ýere Ilima şu ýylyň ýanwarynda Bahreýnde geçen sebitleýin saýlama ýaryşlarynyň netijesi boýunça saýlanypdy.
Merkezi we Günbatar Aziýanyň çempionatynyň saýlama tapgyrynyň netijeleri boýunça Güseýnowa utuklaryň gerekli mukdaryny gazandy, Halkara tennis federasiýasyndan (ITF) ýaryşyň final bölüminde çykyş etmäge çakylyk aldy.
14 ýaşa çenli ýetginjekleriň Aziýa çempionatynda Merkezi we Günbatar Aziýanyň ýygyndysyndan başga-da, Gazagystandan, Indoneziýadan, Hindistandan, Eýrandan, Gonkongdan, Koreýa Respublikasyndan, Kuweýtden, Malaýziýadan, Şri-Lankadan, Siriýadan, Tailanddan, Wýetnamdan türgenler gatnaşdylar, şeýle hem Günorta, Günorta-Gündogar we Gündogar Aziýanyň ýygyndylary gatnaşdylar.
4-nji aprelde başlanan çempionat biri-biriniň yzyndan gelýän iki ýaryşdan ybaratdyr. Oýunlaryň tertibine görä türgenler şahsy we jübüt derejelerde çykyş etdiler. Yklymyň birinjiligi 14-nji aprelde tamamlandy.
ORIENT habarlar
