Türkmenistanyň döwlet gullukçylaryny ABŞ-na 10 aýlyk hünär kämilleşdiriş okuwyna çagyrýarlar
Amerikanyň Kongresi tarapyndan maliýeleşdirilýän Hýubert Hamfri maksatnamasy Türkmenistanyň döwlet edaralarynyň ýolbaşçy wezipelerinde işleýän orta düzümleriň hünärmenlerini 2024-2025-nji okuw ýylynda ABŞ-da 10 aýlyk akademiki hünär kämilleşdiriş okuwyny geçmäge çagyrýar.
Kämilleşdiriş okuwy tejribe toplamaga, gerekli başarnyklary we bilim almaga gönükdirilendir we alymlyk derejesini almagyny göz öňünde tutmaýar – diýip, ABŞ-nyň Türkmenistandaky ilçihanasy habar berýär.
Seçip alma şu aşakdaky ugurlar boýunça geçirilýär:
— tebigy serişdeler, ekologiki syýasat, howanyň üýtgemegi,
— şäher we sebitleriň meýilnamalaşdyrylmagy,
— aragatnaşyk, žurnalistika,
— kanun we adam hukuklary,
— döwlet syýasatynyň seljermesi we döwlet dolandyryşy,
— adam söwdasy, syýasat we öňüni almak,
— tehnologiki syýasat we dolandyryş,
— adam serişdelerini dolandyrmak,
— dolandyryş, meýilleşdirmek we bilim syýasaty,
— iňlis dilini daşary ýurt dili hökmünde okatmak,
— syýasat we jemgyýetçilik saglygy goraýyşy ugrundan dolandyryş,
— syýasat we WIÇ/SPID-iň öňüni almak,
— ýokanç keseller.
Dalaşgärlere esasy bildirilýän talaplar:
— ýolbaşçylyk wezipesinde işine ökdelik we döwlet gullugyna ygrarlylyk,
— doly iş güni bilen bäş ýyldan az bolmadyk iş tejribesi,
— ýokary bilim,
— ýazmaça we dilden iňlis dilini bilmek (TOEFL 525),
Stipendiýa çykdajylaryň 100% öz içine alýar.
Kämilleşdiriş okuwy üçin ýokary bilim hakyndaky diplomy, ýüz tutujynyň hünär derejesini tassyklap biljek adamlardan üç sany maslahat beriş hatyny we ýüz tutmanyň doldurylan formasyny tabşyrmaly.
Ýüz tutmalary tabşyrmagyň soňky möhleti: 2023-nji ýylyň 10-njy iýuny. Maglumat almak üçin şu salga ýazmaly ýa-da şu telefon belgisine jaň etmeli: (+99312) 473503, 473506, 473581, 473584.
ORIENT habarlar
