Aşgabatdaky Rus öýünde şekillendiriş sungaty boýunça kosmosa bagyşlanan ussatlyk sapagy geçirildi
"Kosmosa uçuş" - şeýle at bilen Russiýanyň Aşgabatdaky ilçihanasynyň bilim, ylym we medeniýet bölüminiň binasynda çagalar üçin şekillendiriş sungaty boýunça ussatlyk sapagy geçirildi. Suratkeş Batyr Bekmyradowyň Rus öýünde çagalar bilen geçirilen nobatdaky duşuşygy ertir, 12-nji aprelde bellenilýän Kosmonawtika gününe we Adamyň kosmosa uçuşynyň Halkara gününe bagyşlandy.
Bu gün döredijilik sapagyna gatnaşyjylara älem giňişligi barada pikir ýüwürtmek, ýyldyz açyşlary we galaktikanyň giňişlikleri hakda arzuwlar ummanyny gulaçlamak teklip edildi.
Sapak çeperçilik we sosial-aragatnaşyk meselelerinden başga-da, öwredijilik häsiýetine hem eýe boldy. Çagalar kosmosy özleşdirmek baradaky bilimlerini giňeltdiler we Türkmenistanyň at gazanan sungat işgäri Batyr Gulnazarowiçiň ýolbaşçylygynda kompozisiýa we reňk duýgusyny tapladylar.
Halypanyň berýän maslahatlary arkaly, körpe suratkeşler hyýallarynda älem giňişligine aralaşyp, başdan geçirýän duýgularyny kagyz ýüzüne geçirdiler. Görkezen tutanýerliligi we yhlasy üçin çagalar öz çeken suratlary bilen sylaglandy we olar öz işlerini höwes bilen öýlerine alyp gaýtdylar.
ORIENT news
