Astana Hazar deňziniň daşyndan aýlanyp geçýän awtoulag ýoluny gurmak meselesini Moskwa we Aşgabat bilen ara alyp maslahatlaşmaga taýýar
Gazagystan, degişli teklip berlen ýagdaýynda, Hazar deňziniň gündogar kenar ýakasy boýunça awtoulag ýoluny gurmak meselesini Russiýa we Türkmenistan bilen ara alyp maslahatlaşmaga taýýar. Bu barada Gazagystanyň Senagat we infrastruktura ösüşi ministriniň orunbasary Almaz Idyrysow RIA Nowosti agentligine habar berdi.
Mart aýynyň ahyrynda Russiýanyň wise-premýeri Marat Husnullin RIA Nowosti habarlar agentligine maý aýynda geçiriljek “Russiýa – Yslam dünýäsi: KazanForum” maslahatynda Russiýa Federasiýasynyň Türkmenistan we Gazagystan bilen Hazar deňziniň daşyndan aýlanyp geçýän awtoulag ýoluny gurmak meselesini ara alyp maslahatlaşmagy meýilleşdirýändigini aýtdy, mümkin, ylalaşyga gol çekiler.
Idyrysow: "Ministrlik, gyzyklanma bildirýän taraplar tarapyndan deslapky gepleşikleri geçirmek teklipi öňe sürlen ýagdaýynda, Hazar deňziniň gündogar kenarýakasynyň ugry boýunça awtoulag ýoluny gurmak meselesini ara alyp maslahatlaşmaga taýýar" - diýdi. Ol Hazar deňziniň daşyndan aýlanyp geçýän ýoluň üznüksiz aragatnaşygy ýola goýmaga, şeýle-de ýurtlaryň arasynda ulag potensialyny ýokarlandyrmaga mümkinçilik berjekdigini aýtdy.
Idyrysow gazak tarapynyň bu ugurdaky “Atyrau - Russiýa Federasiýasynyň serhedi” (Astrakhana) bölegiň 2024-nji ýylda tamamlanmagy meýilleşdirilen durkuny täzeleme işlerini alyp barýandygyny aýtdy.
Ministriň orunbasary: "2030-njy ýyla çenli “Žanaozen-Kenderli – Türkmenistan serhedi” we “Atyrau-Dossor” ýollaryny dikeltmek boýunça taslamalary durmuşa geçirmek meýilleşdirilýär" - diýdi.
Ýanwar aýynyň ahyrynda Russiýanyň premýer-ministri Mihail Mişustin bilen wise-premýer Husnulliniň Türkmenistana amala aşyran iş saparynyň netijeleri boýunça ýurtlaryň bilelikdäki ýol taslamasy - Hazar deňziniň gündogar kenarýakasy boýunça awtoulag ýoluny gurmak meselesini ara alyp maslahatlaşýandyklary mälim boldy.
ORIENT news
